Semeıde 2-qabattan qulap kete jazdaǵan sábı qutqaryldy
SEMEI. QazAqparat - Semeılik polıtseıler kópqabatty turǵyn úıdiń ashyq turǵan terezesinen qulap kete jazdaǵan eki jasar sábıdi qutqaryp qaldy, dep habarlaıdy QazAqparat tilshisi.
Oqıǵa I. Panfılov kóshesi,34 meken jaıynda tirkeldi. Ekinshi qabattaǵy páterdiń ashyq turǵan terezesiniń aldynda otyrǵan kishkentaı balany kórgen qala turǵyny 102 nómerine habarlasyp, kómek shaqyrǵan. Sebebi, kórshileri páterdiń esigin jarty saǵat qaqqanmen esikti eshkim ashpaǵan.
Atalǵan mekenjaıǵa patrýldik polıtsııa batalonynyń qyzmet ınspektorlary bar «Barys-13» jedel ekıpaj músheleri jetken. Quramynda polıtsııa leıtenanty Danııar Toqtamysov pen kishi leıtenant Ashat Álkebaev bar.
Oqıǵa ornyna qosymsha kómek shaqyrylady. Biraq qutqarýshylar jetkenge deıin polıtsııa qyzmetkerleri patrýldik mashınany úıdiń qabyrǵasyna jaqyndatyp, tóbesine baspaldaq qoıyp terezeniń aldynda otyrǵan balany túsirip alady.
Araǵa ýaqyt salyp sábıdiń anasy da kelgen. Aıtýynsha, qatty uıyqtap ketken eken. Biraq saraptama kezinde onyń jeńil dárejede mas ekeni anyqtaldy.
«Qutqarýshylardyń jedel áreketiniń nátıjesinde 2 jastaǵy qyz bala aman qaldy. Óıtkeni jylap, mazasy ketken sábı kez-kelgen ýaqytta ashyq terezeden qulap ketýi múmkin edi. Sondyqtan polıtsııa qyzmetkerleri ýaqyt joǵaltpaýǵa tyrysqan. Al sábıin qaraýsyz qaldyryp ketken 33 jastaǵy ana ákimshilik jaýapkershilikke tartylady»,- dedi qalalyq Polıtsııa basqarmasynyń baspasóz hatshysy Elýbek Ospanov.
