Semeıde 18 adamnan turatyn bopsalaýshylar toby ustaldy

SEMEI. QazAqparat - ІІM-niń uıymdasqan qylmysqa qarsy kúres bólinisteri Ulttyq qaýipsizdik komıtetimen birlesip, Abaı oblysy prokýratýrasynyń úılestirýimen Semeı qalasynyń aýmaǵynda bopsalaýshylardyń qylmystyq tobyn ustaý boıynsha arnaıy operatsııa júrgizdi, dep habarlaıdy QazAqparat Polisia.kz-ke silteme jasap.

Ózderiniń krımınaldyq qyzmetin toptyń músheleri resmı túrde tirkelgen qoǵamdyq qordy formaldy qurý arqyly muqtaj turǵyndarǵa qaıyrymdylyq kómek kórsetý túrinde júzege asyryp otyrǵan. Qordyń Instagram áleýmettik jelisinde jeke paraqshasy bar. Qurylǵan kúnnen bastap qordyń esepshotyna qarajat túspegen. Kúdiktiler qordy qarjylandyramyz degen syltaýmen jergilikti jastardan jáne esirtki paıdalanatyn adamdardan aqsha bopsalaǵan. Keıbir jaǵdaılarda qylmyskerler óz qurbandaryn talap etken aqshany alǵanǵa deıin jaldamaly páterlerde ustaǵan.

«Bopsalaýdyń 7 faktisi anyqtaldy. Arnaıy operatsııa barysynda 19 tintý is-sharasy júrgizilip, sýyq jáne travmatıkalyq qarý tárkilendi. 18 adam polıtsııaǵa jetkizildi, olardyń ishinde qylmystyq toptyń 8 negizgi qatysýshysy ustalyp, ýaqytsha ustaý ızolıatoryna qamaldy. Sotqa deıingi tergep-tekserý júrgizilýde», – dedi QR ІІM uıymdasqan qylmysqa qarsy kúres departamentiniń basqarma bastyǵy Qýandyq Alpys.