Semeıde 160 gektar aýmaqta orman órtenip jatyr
SEMEI. QazAqparat – Semeıde 160 gektar aýmaqta orman órtenip jatyr, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 1 maýsymda saǵat 14.27-de «Semeı ormany» rezervatynyń Jańa-Semeı fılıaly Podgorodnee ormanshylyǵynda órt shyqqan.
«Tilsiz jaýdyń jalpy aýdany shamamen 160 gektardy qurady. Qaraǵaılar órtenip jatyr. Órtti sóndirýge jeke quramnan 140 adam men 34 tehnıka jumyldyryldy. Sondaı-aq oqıǵa ornyna qosymsha TJM №68303 áskerı bóliminiń qyzmetkerleri attandy», - dep habarlady vedomstvo ókilderi.
Aldyn ala málimet boıynsha órttiń shyǵýyna naızaǵaı sebep bolǵan.
Esterińizge sala ketsek, osyǵan deıin ShQO trassalarynda aýyr júk kólikteriniń qozǵalysyna shekteý qoıylǵandyǵyn habarlaǵan edik .
