Semeıde 15 adam ata-analyq quqyǵynan aıyryldy

SEMEI.KAZINFORM — Semeı qalasynda tártip saqshylary túnde kóshede eresektersiz júrgen 148 balany anyqtady. 

Oblystyq polıtsııa departamentiniń málimetine súıensek, tártip saqshylary «Quqyqtyq tártip» jedel aldyn alý sharasynyń úsh kúninde 1100-den astam adamdy ákimshilik jaýapkershilikke tartty.

— Osy aralyqta 37 qylmys tirkelip, 1107 adam qoǵamdyq orynda ishimdik ishý, mas kúıde kólik basqarý syndy quqyq buzý jasady. Zań talaptaryn saqtamaǵandar arasynda jasóspirimder de bar. Shara barysynda jańa oqý jylynyń bastalýyna baılanysty balalardyń qaýipsizdigine erekshe nazar aýdaryldy. Mektep mańyndaǵy joldardyń jaı-kúıi de tekserilip jatyr, — delingen aqparatta.

Jasóspirimder arasyndaǵy quqyq buzýshylyqtyń aldyn alý úshin polıtsııa qyzmetkerleri oıyn-saýyq oryndaryn da qadaǵalap keledi.

— Jyl basynan beri túngi ýaqytta kóshede eresektersiz júrgen 148 bala anyqtalǵan. Sondaı-aq ata-analyq mindetin durys atqarmaǵany úshin 452 adam jaýapqa tartylyp, 15 adam ata-analyq quqyǵynan aıyryldy, — delingen habarlamada.

Eske salsaq, osyǵan deıin Aıagóz qalasynyń turǵyny kósheden oq-dári taýyp alǵany habarlanǵan.