Semeıde 142 jyl buryn salynǵan ǵımarattaǵy órt 17 saǵattan keıin sóndirildi
SEMEI. QazAqparat – Semeı qalasynda órt sóndirýshiler 1879 jylǵy ǵımaratta shyqqan jalyndy 17 saǵattan keıin tolyqtaı aýyzdyqtady, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 26 aqpanda saǵat 00.46-da Abaı dańǵylynyń boıynda ornalasqan JShS-nyń ekiqabatty ǵımaratynda órt shyqqan. Órt sóndirýshiler oqıǵa ornyna jedel kelip jetti. Aǵashtan salynǵan 1879 jylǵy ǵımarattyń qabyrǵalaryn, edenin, jıhazdardy jáne jeke zattardy jalyn sharpyǵan.
«Tilsiz jaý saǵat 17.19-da tolyqtaı aýyzdyqtaldy. Órtti sóndirýge 55 adam men 19 tehnıka jumyldyrylǵan. Qyzyl jalynnyń jalpy aýmaǵy 600 sharshy metrdi qurady», - delingen habarlamada.
Aldyn ala málimet boıynsha órttiń shyǵýyna – elektr jabdyqtaryn montajdaý jáne paıdalaný kezinde qaýipsizdik talaptaryn saqtamaý sebep bolýy múmkin.
Esterińizge sala ketsek, osyǵan deıin Cemeıde 142 jyl buryn salynǵan ǵımarattyń túnnen beri órtenip jatqandyǵyn habarlaǵanbyz.
