Semeıde 14 jasar jetkinshek Ertis ózenine batyp ketti
SEMEI. QazAqparat - Shyǵys Qazaqstan oblysynyń Semeı qalasynda 14 jasar jasóspirim sýǵa batyp ketti, dep habarlaıdy QazAqparat.
ShQO TJD baspasóz qyzmetiniń habarlaýynsha, Ertis ózeniniń jaǵasynda kúndelikti qutqarýshylar qaıyqpen jáne jaıaý patrýl júrgizip otyr.
Reıdke áskerılerde belsendi atsalysyp keledi.
24 shildede kezekti aldyn alý sharasyna 40 adam qatysty jáne turǵyndar arasynda sýǵa túsý erejeleri boıynsha nusqaýlyq júrgizdi.
«Qaladaǵy qaýipsiz jáne jabdyqtalǵan jaǵajaılar joqtyǵyna qaramastan, turǵyndar ruqsat etilmegen «Zarıa» jaǵajaı aýdanynda demalýda. 2007 jyly týǵan Besqaraǵaı aýdanynan demalýǵa kelgen balany aǵys aǵyzyp áketip bara jatqanyn kórgen kýágerler sol sátte qutqarýshylarǵa habar berdi», – dep habarlady TJD baspasóz qyzmeti.
Oqıǵa ornyna kelgen jedel-qutqarý jasaǵynyń qyzmetkerleri jetkinshekti izdeýge kirisken.
Súńgýirler sýǵa tústi, jaǵalaýdan izdestirý jumysy uıymdastyryldy, biraq esh nátıje bermedi.
Búgin, 25 shildede balanyń denesin izdeý sharalaryna qatysqan jaqyn týystary taýyp aldy.
Ol sýǵa ketken ornynan 11 shaqyrym jerden tabyldy.
Tótenshe jaǵdaılar qyzmeti jeke qaýipsizdik sharalaryn qatań saqtaýdy eskertedi.
