Semeıde 12 jastaǵy balany sabap ketken 3 jasóspirimge qatysty qylmystyq is qozǵaldy

SEMEI. KAZINFORM — Semeı qalasynda 3 jasóspirim jetkinshekti jabylyp sabap, aýrýhanaǵa túsirdi. 

Belgili bolǵandaı, oqıǵa qaladaǵy ózen jaǵasynda bolǵan. Balyq aýlap turǵan 12 jastaǵy balaǵa jasóspirimder tıise jónelgen. Úsheýi oǵan jabylyp, soqqyǵa jyqqan. Sonyń saldarynan jetkinshekke ortasha dárejedegi dene jaraqaty keltirildi. 

— Jábirlenýshi aýrýhanaǵa jatqyzyldy. Atalǵan fakti boıynsha QK-niń 107-baby boıynsha qylmystyq is qozǵaldy. 3 bozbalaǵa qatysty materıaldar jınalyp, olar Semeı qalasy ákimdigi janyndaǵy kámeletke tolmaǵandar isi jónindegi komıssııanyń qaraýyna joldanbaq. Budan keıin jasóspirimder kámeletke tolmaǵandar isi jónindegi bólimshe esebine alynyp, jeke tárbıe jumystary júrgiziledi, — dep habarlady Abaı oblystyq Polıtsııa departamentiniń baspasóz qyzmetinen.

Іstiń tergelý barysy departament basshylyǵynyń baqylaýyna alynǵan. 

Eske salsaq, osyǵan deıin Pavlodar oblysynda quny 100 mln teńgeden asatyn zańsyz veıp satpaq bolǵan top ustalǵany jaıly jazǵanbyz.