Semeıde 12 myń bótelke jalǵan alkogol tárkilendi

ASTANA. KAZINFORM – Qarjylyq monıtorıng agenttigi Abaı oblysy boıynsha departamenti prokýratýranyń úılestirýimen jáne Semeı qalasy boıynsha Memlekettik kirister departamentimen birlesip, zańsyz alkogol ónimderin óndiretin jasyryn tsehtyń qyzmetin toqtatty.

Vedomstvo málimetinshe, tergeý barysynda Semeı qalasynyń turǵyny tıisti lıtsenzııasyz alkogol óndirýdi uıymdastyrǵany anyqtalǵan.

Belgili bolǵandaı, alkogol ónimderi ártúrli orynjaılar men garajdarda spırtti sýmen aralastyrý arqyly daıyndalyp, keıin tanymal brendterdiń ataýymen shyny bótelkelerge quıylǵan. Ónimge zańdy sıpat berý úshin aldyn ala qoldan jasalǵan esepke alý-baqylaý markalary paıdalanylǵan.

- Tintý barysynda zańsyz aınalymnan «Finsky Ice» jáne «Sıbırskıe morozy» ataýlarymen 12 myńnan astam bótelke alkogol ónimi, 8 myńnan asa bos bótelke, 10 myń lıtrden astam spırt quramdy suıyqtyq, jalǵan esepke alý-baqylaý markalary, sondaı-aq óndirý jáne býyp-túıý jabdyqtary tárkilendi.

Sot sanktsııasymen tseh ornalasqan jekemenshik úıge, sondaı-aq ónimdi tasymaldaýǵa paıdalanylǵan úsh avtokólikke tyıym salyndy, - delingen agenttik aqparatynda.

Kúdiktige qatysty elden shyqpaý jáne tıisti minez-qulyq týraly qolhat túrindegi bultartpaý sharasy tańdaldy.

Qazirgi ýaqytta sotqa deıingi tergep-tekserý jalǵasyp jatyr. Qazaqstan Respýblıkasy Qylmystyq-protsestik kodeksiniń 201-babyna sáıkes ózge aqparat jarııa etilmeıdi.

Qarjylyq monıtorıng agenttigi mundaı ónimderdi tutyný azamattardyń ómiri men densaýlyǵyna eleýli qaýip tóndiretinin eskertti.

– Jalǵan alkogol ónimderin paıdalaný ýlanýǵa, ishki aǵzalardyń, sonyń ishinde baýyr men búırektiń zaqymdanýyna, tipti adam ólimine ákelýi múmkin, – dep málimdedi agenttik.

Aıta keteıik, UQK Shekara qyzmeti 60 mln teńgelik temeki kontrabandasynyń jolyn kesti.