Semeıde 116 jyl buryn boı kótergen kóne ǵımarat qalaı ózgeredi
SEMEI. KAZINFORM — Semeı qalasynyń ortalyǵyndaǵy bir ǵasyrdan astam ýaqyt buryn salynǵan burynǵy zooveterınarlyq ınstıtýttyń ǵımaraty talaı jyl boıy tozyp tur. Endi bul sáýlet óneriniń eskertkishi qalypqa keltiriletindigi belgili boldy. Onyń jańa beınesi qandaı bolady, ishinde ne ornalasady? Bul saýaldardyń jaýabyn Kazinform tilshisi bilip kórdi.
Tarıhı eskertkishter tiziminde tur
116 jyl buryn boı kótergen úshqabatty kóne ǵımaratta zooveterınarlyq ınstıtýt ornalasqan. Ony aǵaıyndy Mýsınder salǵan. Alaıda Semeıdiń qaq ortasyndaǵy nysan ýaqyt óte kele qaraýsyz qalyp, ábden tozyp ketken.
Semeı qalasynyń sáýlet jáne qala qurylysy bóliminiń málimetinshe, ákimdiktiń 2023 jylǵy 15 jeltoqsandaǵy № 1056 qaýlysymen burynǵy zooveterınarlyq ınstıtýt ǵımaraty tarıhı jáne mádenıet eskertkishter qataryna qosylǵan.
Al «Biryńǵaı memlekettik jyljymaıtyn múlik kadastry» aqparattyq júıesiniń derekteri boıynsha búginde ǵımarattyń menshik ıesi — «Semey Property» JShS.
Aqpan aıynyń aıaǵyna qaraı qala turǵyndary Shaıjúnisov kóshesiniń Shákárim dańǵylynan Uranhaev kóshesine deıingi bóligi jabylǵanyn baıqady. Buǵan burynǵy zooveterınarlyq ınstıtýt ǵımaratyn rekonstrýktsııalaý jobasynyń iske asyryla bastaǵandyǵy sebep bolǵan.
Qonaqúı-meıramhana keshenine aınalmaq
Jobanyń qalaı iske asyrylatyndyǵyn bilý úshin Semeı qalasy ákimdigine saýalhat joldadyq.
— Qazirgi ýaqytta ǵylymı-jobalyq qujattama ázirlenip jatyr. Qajetti kelisimderden jáne ruqsat qujattaryn alǵannan keıin qurylys-montajdaý jumystaryn bastaý josparlanǵan. Nysandy paıdalanýǵa berý merzimi — 2028 jyl. Jobany iske asyrýdyń jalpy merzimi 36 aıdy quraıdy, — dep jaýap berdi kásipkerlik bóliminiń basshysy Erkebulan Nakıpov.
Jobaǵa sáıkes, ǵımarat tarıhı kelbetin saqtaı otyryp, shamamen 12 000 sharshy metr aýmaqtaǵy kópfýnktsıonaldy keshen retinde qaıta beıimdelmek.
1-blok — qonaqúı-meıramhana kesheni bolady. Onda mýzeı, meıramhana, konferents-zal, 84 qonaqúı nómiri ornalasady.
2-blokta ákimshilik-kommertsııalyq úı-jaılar, ıaǵnı býtıkter men keńseler bolady.
— Jobany sapaly iske asyrý maqsatynda ınvestor tarapynan tarıhı-mádenı mura obektilerinde restavratsııalyq jumystardy oryndaýǵa tıisti memlekettik lıtsenzııasy bar mamandandyrylǵan uıym — «KazProektRestavratsııa» JShS tartylǵan. Qurylys-montajdaý jáne restavratsııalyq jumystar qatań túrde Qazaqstan Respýblıkasynyń tarıhı-mádenı mura obektilerin qorǵaý jáne paıdalaný salasyndaǵy qoldanystaǵy zańnama talaptaryna sáıkes júzege asyrylady. Joba boıynsha jalpy basshylyq pen úılestirýdi ınvestor retinde «Semey Property» JShS júzege asyrady, — dedi Erkebulan Nakıpov.
Turǵyndarǵa yńǵaısyzdyq týdyrdy
Bul jańalyqty estigen semeılikterdiń basym bóligi qýanǵanymen, Shaıjúnisov kóshesindegi kólik qozǵalysyna engizilgen shekteýge narazylyq bildirip jatqandar da az emes.
— Semeıde bos jer kóp qoı. Nege dál qalanyń ortasynda qurylys jumystaryn júrgizý kerek? Onsyzda munda únemi kólik keptelisi týyndaıdy. Jyl ótken saıyn keptelis kóbeımese azaıǵan joq. Al ortalyq kóshelerdiń birine shekteýdiń engizilýi jaǵdaıdy odan saıyn qıyndatyp tur, — deıdi Ádil esimdi qala turǵyny.
Bul jol ýchaskesiniń qashanǵa deıin jabyq turatynyn bilý úshin jolaýshylar kóligi jáne avtomobıl joldary bólimine habarlastyq.
— Shaıjúnisov kóshesiniń Shákárim dańǵylynan Uranhaev kóshesine deıingi bóligin ýaqytsha jabý qurylys-montaj jumystaryn júrgizýge baılanysty bolyp otyr. Atalǵan shekteý jol qozǵalysy qaýipsizdigin qamtamasyz etý maqsatynda engizilgen. Jol 2026 jylǵy 23 aqpannan bastap qurylys jumystary tolyq aıaqtalǵanǵa deıin jabyq bolady, — dep jaýap berdi bólimnen.
Eske salsaq, buǵan deıin Petropavldaǵy Qalyńdyq úıi jańaryp, ekinshi tynysy ashylǵany jaıly jazǵanbyz.
