Semeıde 11 úıdi tonap ketken ákki ury qolǵa tústi
SEMEI. QazAqparat – Semeıde polıtsııa qyzmetkerleri 11 úıdi tonap ketken ákki uryny ustady, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, polıtsııa qyzmetkerleri jedel-izdestirý barysynda úı tonaýmen aınalysqan Semeı qalasynyń 29 jastaǵy turǵynyn ustady.
Qazirgi ýaqytta er adamnyń 11 úıge urlyqqa túskeni anyqtalyp otyr.
«Ákki ury tereze arqyly úıge kirip júrgen. Turmystyq tehnıka, baǵaly zergerlik buıymdar men aqsha urlap, iz sýytyp otyrdy. Urlanǵan zattardy Semeıdegi lombardtarǵa ótkizgen», - dep habarlady vedomstvo ókilderi.
Tártip saqshylary barlyq faktiler boıynsha QR QK-niń 188-baby 3-bóligi 2-tarmaǵymen tergeý amaldaryn júrgizýde.
Kúdiktiniń basqa da ashylmaǵan qylmystarǵa qatysy bar-joǵy tekserilip jatyr.
