Semeıde 10 jylǵa jýyq jaryq pen sýsyz otyrǵan turǵyndar bar

SEMEI. QazAqparat - Semeıdegi Komsomol jáne Ushaqtar kentiniń turǵyndary 10 jylǵa jýyq ýaqyt úılerine jaryq pen aýyz sý tarta almaı keledi. Turǵyndarmen júzdesýge arnaıy barǵan qala ákimi Ermak Sálimov atalǵan máseleni taıaýda sheship berýge ýáde etti, dep habarlaıdy QazAqparat.

Búginde Ushaqtar kentindegi 150-den asa otbasy aýyz sý men jaryqqa zárý. Turǵyndar jaryqty jaqyn mańdaǵy turǵynúı ıelerinen surap, tartyp alyp otyr. Bul zańsyz. Onyń ózinde tok kúshin kótermegendikten jaryq óship qalady eken. Al tartylyp turǵan jeliler jerge jaqyn. Sondyqtan mundaǵy turǵyndardyń armany memlekettiń elektr qýaty jelisine qosylý. Al aýyz sýdy turǵyndar tasyp ishýge májbúr. Bul jaǵdaı - Komsomol kentiniń turǵyndary úshin de basty másele. Uzaq jyldar ákimdiktegilerden kómek surap kele jatqan turǵyndardyń jaǵdaıy jergilikti bılik ókilderine tanys. Degenmen, qarjy máselesi qolbaılaý bolǵan eken.

Kent turǵyndarymen kezdesken qala ákimi máselelerdi jyl sońyna deıin sheshýge ýáde etti. Jaryq jáne sý tartý úshin arnaıy jobalyq smetalyq qujat daıyn. Oblystyq jáne qalalyq bıýdjetten 2 mlrd 8 mln teńge qarjy bólingen. Taıaýda baıqaý arqyly jumystarmen aınalysatyn merdiger mekeme anyqtalady. Jyl sońyna deıin sý máselesi sheshilmek. Al jaryq tartý jumysy bıyl bastalady. Biraq jumystar keler jyly aıaqtalady, dep ýáde berdi shahar basshysy turǵyndar aldynda.

«Bıyl baıqaý jarııalap, tender ótkizemiz. Merdiger mekemeni tańdaǵannan keıin jumysqa kirisemiz. Biraq jaryq máselesi kelesi jyly tolyq sheshiletin bolady. Al sý máselesine 10 kúnniń ishinde kirisemiz. Bul jumystarmen aınalysatyn merdiger daıyn. Jyl sońyna deıin», - dedi qala basshysy.