Semeıde 10 jyl turalap turǵan meshittiń qurylysy qaıta bastalady

SEMEI. QazAqparat - Semeıde 2008 jyly irgetasy qalanǵan  meshittiń qurylysy áli kúnge deıin toqtap tur. Oǵan sebep - qarjy tapshylyǵy. Endi osy jazda meshit qurylysy qaıta jandanbaq. Bul úshin kásipkerler tartylady, dep habarlaıdy QazAqparat tilshisi.

Úsh myń adamǵa arnalǵan jańa meshittiń qurlysyna almatylyq jáne semeılik kásipkerler kirispek. Qazir arada kelissózder júrip jatyr.

Semeıde 11 meshit bar. Qalada qulshylyq etetinderdiń sanynyń artýyna baılanysty olarda oryn jetkiliksiz. Juma namazyna kelgender meshitterge syımaı qalady. Eger jańa meshittiń qurylysy aıaqtalyp, paıdalanýǵa berilse, bul másele sheshilýi múmkin.

Búgingi kúni meshittiń munaralary turǵyzylyp, qabyrǵasy jartylaı qalanǵan, kommýnıkatsııa tartylǵan. Bul jumystarǵa 300 mln teńge ketken. Endi tóbesin jabý úshin shamaman 120 mln teńge qajet. Al qurylysty tolyq aıaqtap, halyq ıgiligine berý úshin qosymsha qarajat kerek. Buǵan metsanattar jumyldyrylmaq.

«Maýsym aıynyń 29-y kúni  Almatyda turatyn Semeıdiń týmalary keledi. Sodan keıin qajetti qarajat bólinip, jumystar bastalady dep otyrmyz. Jergilikti kásipkerler de kómektesedi degen úmit bar. Usynystarymyzdy  aıttyq. Kez kelgen  adam meshit qurylysyna qolynan kelgenshe kómek bere alady», - dedi QMDB-nyń Semeı óńirindegi ókil ımamy Maqsat qajy Altybaı.

Salynyp jatqan meshit 4 munaraly, segiz qyrly. Tórt munarasynyń bıiktigi 63 metr.  Aldynda úlken saıabaq, 500 kólikke arnalǵan avtoturaq, kólikterge arnalǵan aspaly kópir bolady.