Semeıde 10 qabatty úıdiń shatyryna shyǵyp ketken bala qutqaryldy
ASTANA. QazAqparat - ShQO qutqarýshylary 10 qabatty úıdiń shatyryna shyǵyp alǵan balany qutqardy, dep habarlaıdy QazAqparat tilshisi.
«5 jeltoqsan kúni 17 saǵat 14 mınýtta «112» nómirine habarlasqan turǵyndar Dokýchaev kóshesindegi 10 qabatty úıdiń shatyrynda balanyń turǵanyn habarlady. Aqparat túsken sátte-aq, Órt sóndirý jáne apattyq-qutqarý jumystary qyzmetiniń Semeı qalasyndaǵy №2 jasaǵynyń qutqarýshylar brıgadasy oqıǵa ornyna attandy», - dep habarlady ShQO TJD Semeı qalalyq Tótenshe jaǵdaılar basqarmasynan.
Oqıǵa ornynda qutqarýshylar, polıtseıler men páter ıeleri kooperatıviniń (PIK) qyzmetkeri shatyrǵa shyǵatyn esikti kiltpen ashyp, balany tómen túsirip alǵan. Jas «rýfer» bar bolǵany 10 jasta.
Oqıǵanyń mán-jaıyn anyqtaý barysynda 2007 jyly týǵan balanyń psıhonevrologııalyq dıspanserdiń esebinde turǵany anyqtaldy. Balanyń ózi jer úıde turady. 10 qabatty úıdiń shatyryna shyǵatyn barlyq esikter jabyq bolǵan. Onyń joǵary qalaı shyqqany belgisiz. Balanyń sóıleýde kemistigi bar.
«PIK qyzmetkerleriniń biri shatyrǵa shyqqanda, bala da sońynan erip, sonda qalyp qoıǵan bolýy múmkin. Qutqarýshylar ata-analardan óz balalaryna jiti qaraýdy jáne olardyń qaýipsizdigin qamtamasyz etý sharalaryn qolǵa alýdy suraıdy», - delingen taratylǵan habarlamada.
