Semeıde 1,5 mlrd teńgege sý júıesi qondyrǵylary satyp alynady

SEMEI. QazAqparat - Semeıde  sýmen qamtý jáne sý ótkizý júıeleri jańǵyrtylady. Uzaq jyldar jóndeý júrgizbegen «Semeı Vodokanal» mekemesi «Eýropalyq qaıta qurý jáne damý bankine» ótinish bildirgen. Nátıjesinde 1,5 mlrd teńge  nesıe berilip, birneshe jańa qurylǵylar satyp alyndy, dep habarlaıdy QazAqparat.

Eýropalyq qaıta qurý jáne damý banki arqyly qarjylandyrylǵan jobalar  aıasynda  sorǵy beketterine arnalǵan jabdyqtar,  arna jýý jáne aralas mashına,  sýdy esepke alý aspaptary,  hlorlaý qondyrǵylary, avtomatty synama alý jáne ıneli súlgileý jabdyǵy satyp alynady. Qazirgi ýaqytta merdigerler jabdyqtardy jetkizý ústinde. Jetkizilip úlgergen jabdyqtar, arna jýý, sý esepteý quraldary kópshilikke arnaıy tanystyryldy.   

Jobanyń jalpy quny - 1,5 mlrd 300 myń teńge. Satyp alynǵan mamandandyrylǵan tehnıkalar men qurylǵylar qala turǵyndaryn taza aýyz sýmen qamtýǵa baǵyttalyp otyr.

Sondaı-aq, joba aıasynda uzyndyǵy 7, 823 shaqyrym sý qubyry, uzyndyǵy 0, 668 km bolatyn káriz jelilerin jańǵyrtý josparlanyp otyr. Aıta keteıik, sý júıesin jetildirýge qatysty jumystar 2018 jyly qalanyń oń jáne sol jaq bóligindegi apatty aýmaqtarda atqarylmaq.

«Búgingi kúni jańǵyrtý jumystaryn júrgizýge bıýdjet qarajaty jetkiliksiz. Sondyqtan  biz bıýdjetten tys kózderdi tabýǵa tyrystyq. Al Eýropalyq Qaıta qurý jáne Damý Bankiniń aıasynda qalada birneshe jobany júzege asyrdyq. Bul jobalar turǵyndardyń ıgiligi úshin jasalyp jatyr. Qazirde bank sheńberinde jasalǵan jalpy kelisimshart somasy 12,8 mlrd teńgeni quraıdy. Bul turǵyndardy  ystyq sýmen jáne jylýmen qamtamasyz etý baǵytynda. Qalanyń Zaton bóligin, Qaınar, Novoshýlbınsk, Novobajenovo aýyldyq okrýgterin taza sýmen qamtamasyz etemiz», - dedi qala basshysy Ermak Sálimov.