Semeı zıratynda Qaıym Muhamedhanovtyń qulpytasyn vandaldar qıratyp ketti
SEMEI. QazAqparat – Semeı qalasynyń zıratynda ǵalym Qaıym Muhamedhanovtyń qulpytasyn belgisiz bireýler buzyp ketken, dep habarlaıdy QazAqparat tilshisi.
Qoǵam qaıratkeri, Memlekettik syılyqtyń ıegeri Qaıym Muhamedhanovtyń qulpytasy bıyl birinshi ret buzylyp otyrǵan joq. Ǵalymnyń bel balasy Qanaǵat Qaıymulynyń aıtýynsha, osydan 10 jyldam astam ýaqyt buryn belgisiz bireýler qulpytasty alǵash ret qıratyp ketken.
«Bıyl ákemizdiń 105 jyldyǵynda da bul qııanat qaıtalanyp otyr. Kúni keshe týǵan-týystarmen birge zııarat jasaý úshin ákemizdiń basyna barǵan edik. Buzylyp, toz-tozy shyǵyp jatqan qulpytasty kórgende jaǵamyzdy ustadyq. Bul degen masqara ǵoı! Eli úshin eńbek etken, óle-ólgenshe halqynyń qamyn jegen ákemizdiń arýaǵyn qorlaý kimge kerek?! Vandaldardyń áreketin osylaı beı-jaı qaldyrýǵa bolmaıdy. Olar basqa qulpytastarǵa esh zaqym keltirmeı, tek ákemizdikin ǵana talqandap ketken «, - dedi ol.
Osy máseleni Semeı qalasynyń ákimdigi birden nazarǵa alǵan.
«Búgin shahar ákiminiń orynbasary Aıdar Sadyrbaev bizben birge beıit basyna bardy. Buzylǵan jerlerin qarap, mamandarǵa teksertip, aldaǵy ýaqytta jóndeý jumystary júrgiziletinin jetkizdi. Aldaǵy ýaqytta mundaı jaǵdaı qaıtalanbasa eken deımiz», - dedi Qanaǵat Qaıymuly.
