Semeı jylytý maýsymyna daıyn emes, bir qazandyqta jaǵdaı áli kúrdeli

Semeı qalasyndaǵy Ǵabbasov qazandyǵy áli kúnge deıin jylytý maýsymyna daıyn bolmaı otyr, dep habarlaıdy QazAqparat tilshisi.

Abaı oblysyndaǵy aýdan-qalalarda jylytý maýsymyna daıyndyq qyzý júrip jatyr.

Olqylyqtarǵa jol bermes úshin quzyrly organdar baqylaýdy kúsheıtken.

Búgin óńir ákiminiń orynbasary Dımıtrıı Garıkov Semeı qalasyndaǵy qazandyqtar men jylý jelilerindegi jóndeý jumystaryn tekserdi.

Ol «Ortalyq» jáne «Ǵabbasov» qazandyqtaryn, aýla jáne magıstraldyq jylý jelilerin aralady.

«Qaıta jańǵyrtý jumystary júrgizilip jatqan Ǵabbasov qazandyǵyndaǵy jaǵdaı áli kúnge deıin óte kúrdeli. Qazir jumys istep turǵan úsh qazandyqty ýaqytyly iske qosý da úlken másele. Áleýmettik nysandardy jylýmen qamtamasyz etý úshin jańadan salynǵan tórtinshi qazandyqty qazan aıynyń birine deıin qosýymyz qajet. Jumys qarqynyn arttyrý kerek», - dedi Dımıtrıı Garıkov.

Oblys ákiminiń orynbasary tekserý barysynda anyqtalǵan kemshilikterdi 15 qyrkúıekke deıin qalpyna keltirýdi tapsyrdy.

Budan bólek jaqyn arada qaıta tekserý júrgizetinin eskertti.

Eske salsaq, osyǵan deıin Abaı oblysynyń halqyna jylytý maýsymynda 570 myń tonnaǵa jýyq kómir qajettigi habarlanǵan.