Semeı jáne Zyrıandaǵy úılerden sýdy sorǵytý jumystary júrip jatyr
ASTANA. QazAqparat - ShQO tótenshe jaǵdaılar departamentiniń baspasóz qyzmeti sý tasqynyna baılanysty óńirdegi qazirgi jaǵdaı týraly málimdeme jasady, dep habarlaıdy QazAqparat.
Keshe Ertis ózeniniń arnasynan tasýy saldarynan «Semeı-Dolan» avtojolynyń 32-kılometrin sý basty. Jergilikti polıtsııa qyzmeti jol qozǵalysyn toqtatyp, beket ornatty.
Qutqarýshylar sý tasqynyna jaqyn mańdaǵy úılerdiń turǵyndaryn - jalpy 18 adamdy evakýatsııalady. Olarǵa mektepten ýaqytsha baspana berildi. Glýhovka aýylynda qutqarýshylar jergilikti turǵyndar arasynda qaýipsizdik sharalaryn saqtaý jaıly túsindirý jumystaryn júrgizdi.
Birlik aýylynda 38 tútin bar, onda 116 adam turady. Munda aýdannyń TJ, Órt sóndirý qyzmetteriniń qyzmetkerleri kezekshilik uıymdastyrǵan.
Keshe Besqaraǵaı aýdanynyń Krıvınka aýylynda mamandar Ertis ózeniniń muzyn ýatý úshin jarý jumystaryn júrgizdi.
Qazir Besqaraǵaı aýdanynda 40 qutqarýshy, 13 tehnıka jáne 4 júzý quraly jumyldyrylǵan.
Sonymen qatar Zyrıan aýdanynda, Zyrıan qalasynda da tasqyn saldaryn joıý jumystary júrgizilýde. Qutqarýshylar sý astynda qalǵan 72 úıdi sýdan tazalap jatyr. Bir táýlikte 47 myń tekshe metr sý shyǵaryldy.
Turǵysyn aýylynda sý ótkizetin arna keńeıtilip, Chapaevoda bóget nyǵaıtylyp jatyr, Parygınoda sý burǵysh arna qazylýda, al Andreevkada kópir jóndeýden ótýde.
Semeıde de tasqyn saldaryn joıý jáne qalany tazalaý jumystary júrgizilýde.
ShQO TJD-da jedel shtab úzilissiz jumys istep tur. Kóptegen aýdanda jaǵdaı turaqtala bastaǵan soń kesheden bastap jedel jeliniń telefony jabyldy.
