Semeı jádigerleri Astana murajaıyna qoıyldy
STANA. Mamyrdyń 14-i. QazAqparat /Jasulan Amanbaıuly/ - Astanadaǵy QR Tuńǵysh Prezıdentiniń murajaıynda Semeı murajaılary qorynan «Uly tulǵalar besigi» atty kórme ashyldy,
dep habarlaıdy QazAqparat.
Kórmede Semeı qalasyndaǵy Abaı atyndaǵy ǵylymı ámbebap kitaphanasynan, Abaıdyń memlekettik tarıhı-mádenı jáne ádebı-memorıaldyq qoryq-murajaıynan aqyn Abaı Qunanbaevtiń ómirimen, shyǵarmashylyǵymen baılanysty qundy jádigerler ákelip qoıylǵan. Murajaı sórelerinde dana aqynnyń óz qolymen kúmispen kúptep jasaǵan ertoqymy, at ábzelderi, turmysynda qoldanǵan tól zattary, sonymen qatar Abaıdyń sırek qoljazbalary men týyndylary tizilgen. Semeı murajaıynda asyldyń kózindeı saqtaýly turǵan jazýshy M.Áýezovtyń óz qolymen syıǵa tartqan aqynnyń kózi tirisinde túsken fotosýretteri jáne Abaı úıiniń dúnıeleri de jetkizilgen.
«Jastardy osyndaı sharalar arqyly, ótken tarıhymyzdy nasıhattaý arqyly ulttyq qundylyqtarǵa jaqyndastyrý kerek. Sondyqtan kórmeniń tek Astanada ǵana emes, oblys ortalyqtarynda da ótkizý qajet dep esepteımin», deıdi Shyǵys Qazaqstan oblysy ákiminiń orynbasary Ermak Sálimov.
QR Tuńǵysh Prezıdentiniń murajaıynda Qazaqstannyń ár oblystaryndaǵy murajaılardan jádigerler ákelip, kórme ótkizý dástúri qalyptasqan. Osymen 3-shi jyl boıy ótkizilip otyrǵan «Alǵa umtylǵan Qazaqstan» aımaqaralyq kórme jobasynyń kóktemgi kezeńin búgin Shyǵys Qazaqstan óńiriniń murajaılary ashty. «Uly tulǵalar besigi» kórmesi elordada bir aıǵa jalǵasady.
Semeı qalasyndaǵy Abaı atyndaǵy ǵylymı ámbebap kitaphanasy - Qazaqstandaǵy kóne mádenıet oshaqtarynyń biri. Alǵashqy ashylǵan jyly (1883 jyldyń qazan aıy) qoǵamdyq kitaphananyń 130 oqyrmany, 274 dana kitap qory bolǵan. Qazirgi tańda kitaphana qorynda asa baǵaly qundy 4,5 myńnan asa sırek basylymdar qory men 400 myńǵa jýyq ádebıetter qoryn 17 myńnan asa oqyrman paıdalanady.
Al Abaıdyń memlekettik tarıhı-mádenı jáne ádebı-memorıaldyq qoryq murajaıy - aqynnyń týǵanyna 95 jyl tolýy qarsańynda 1940 jyldyń sáýirinde ashyldy. Onyń negizgi qoryn 1885 jyly ólketaný murajaıyna Abaı tapsyrǵan zattar quraıdy. Murajaı qorynda atalmysh zattardyń 30-ǵa jýyǵy saqtaýly. Búgin sonyń bir pushpaǵy Astana jurtshylyǵyna usynyldy.
