Semeı ıadrolyq synaq polıgonynan zardap shekken óńirdegi azamattardyń zeınetke shyǵý jasyn tómendetý qajet-N. Sabılıanov
ASTANA. Jeltoqsannyń 9-y. QazAqparat /Qanat Mámetqazyuly/ -Semeı ıadrolyq synaq polıgonynan zardap shekken óńirdegi azamattardyń zeınetkerlikke shyǵý jasyn tómendetý kerek. Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Nurtaı Sabılıanov osylaı málim etti,
dep habarlaıdy QazAqparat.
«Semeı óńirindegi saılaýshylarmen kezdesý barysynda Shyǵys Qazaqstan oblysy Abaı aýdanynyń turǵyndary tarapynan kóterilgen ózekti máselelerdiń biri - Semeı ıadrolyq synaq polıgonyndaǵy uzaq ýaqyt ıadrolyq synaqtar júrgizýdiń saldarynan zardap shekken azamattardy áleýmettik qorǵaýdy jetildirý máselesi boldy. Bul rette, halyq osy baǵyttaǵy arnaıy zańǵa ózgerister engizý qajettigin alǵa tartady. «Semeı ıadrolyq synaq polıgonynan zardap shekken azamattardy qorǵaý» zańy 1992 jyly qabyldanǵan eken. Árıne, osy ýaqytqa deıin zańnyń tıgizgen járdemi de boldy. Degenmen, jurtshylyq talaptaryna oraı, atalǵan qoldanystaǵy zańǵa ózgeris engizýdi zaman talaby dep qaraǵan jón», dedi depýtat.
Sonymen birge, depýtat óńirdegi tótenshe radıatsııalyq aımaqqa erekshe mártebe berý, emhanalar salý máseleleriniń de ózekti bolyp otyrǵanyn alǵa tartty. «Osyǵan oraı, Úkimet Semeı ıadrolyq synaq polıgonyndaǵy ıadrolyq synaqtardyń saldarynan zardap shekken, tótenshe jáne eń joǵary radıatsııalyq qaýipti aımaqta turatyn azamattardyń zeınetkerlikke shyǵý jasyn tómendetýdi, óńirdegi zeınetke shyqqan azamattardyń ústemeaqy alý quqyǵyn shektemeýdi qarastyrsa ıgi. Bunymen qosa, ekologııalyq járdemaqy tóleý máseleleri de oń sheshimin tabýy kerek dep bilemin», dedi depýtat.
