«Semeı ıadrolyq qaýipsizdik aımaǵy týraly» zań jobasy qandaı máselelerdi sheshedi

NUR-SULTAN. QazAqparat – QR Energetıka mınıstri Maǵzum Myrzaǵalıev «Semeı ıadrolyq qaýipsizdik aımaǵy týraly» zań jobasy qandaı máselelerdi sheshýge kómektesetinin aıtty, dep habarlaıdy QazAqparat tilshisi.

Parlament Májilisinde Energetıka mınıstri «Semeı ıadrolyq qaýipsizdik aımaǵy týraly» jáne «Qazaqstan Respýblıkasynyń keıbir zańnamalyq aktilerine Semeı ıadrolyq qaýipsizdik aımaǵy máseleleri boıynsha ózgerister men tolyqtyrýlar engizý týraly» QR Zań jobalaryn usyndy.

Qaralyp otyrǵan zań jobasy burynǵy Semeı polıgony jerlerin paıdalaný, onyń aýmaǵyn ońaltý, eldiń ǵylymı áleýetin damytý máselelerinde baqylaýdy kúsheıtýge baǵyttalǵan.

«Ózekti problemalardy sheshý úshin zań jobalarynda mynadaı sharalar usynylady: tıimdi basqarý maqsatynda jańa jer sanatyn – «ıadrolyq qaýipsizdik aımaǵynyń jerlerin» engizý; Semeı ıadrolyq qaýipsizdik aımaǵynyń jumystaryn oryndaýǵa jaýapty bolatyn Energetıka mınıstrliginiń vedomstvolyq baǵynysty uıymyn taǵaıyndaý; keshendi ekologııalyq tekserý jáne memlekettik ekologııalyq saraptama nátıjeleri boıynsha normadan tys radıatsııalyq lastanǵan jáne shartty taza aýmaqtardyń shekaralaryn aıqyndaý; polıgonnyń lastanǵan jerleriniń mártebesin «zapastaǵy jerler» sanatynan «ıadrolyq qaýipsizdik aımaǵynyń jerleri» sanatyna ózgertý jáne lastanǵan jerlerde Semeı ıadrolyq qaýipsizdik aımaǵyn qurý, jerlerdi aýystyrý, shekaralar men alańdardy Úkimet qaýlysymen aıqyndaý; radıatsııalyq jaǵdaıǵa monıtorıng júrgizý jáne baqylaý; lastanǵan ýchaskelerdi ońaltý jáne qalyptasqan radıoaktıvti qaldyqtardy saqtaý pýnktin salý; mamandandyrylǵan aımaqta ıadrolyq qaýipsizdikti qamtamasyz etý sharalaryn uıymdastyrý», - dedi Maǵzum Myrzaǵalıev Májiliste ótken dóńgelek ústelde.

Sondaı-aq, mınıstr normadan tys lastanǵan aımaqta jumys isteıtin Energetıka mınıstrliginiń vedomstvolyq baǵynysty uıymy retinde QR Ulttyq ıadrolyq ortalyǵyn taǵaıyndaý kózdelgenin jetkizdi.

Buǵan deıin Maǵzum Myrzaǵalıev Semeı ıadrolyq polıgony jabylǵannan keıin týyndaǵan máselelerdi aıtyp bergen edi.

Sonymen birge Semeı ıadrolyq polıgonynda 13 jyl júrgizilgen zertteý jumystary aıaqtaldy.

Búgingi tańda aýmaqtyń 100 paıyzy tekserilip, 2008-2021 jyldarǵa arnalǵan qorytyndy esep daıyndaldy.