Semeı ıadrolyq qaýipsizdik aımaǵynyń shekarasy tolyq belgilendi
ASTANA. KAZINFORM — 2026 jylǵy 28 tamyzda burynǵy Semeı ıadrolyq synaq polıgonynyń aýmaǵynda Semeı ıadrolyq qaýipsizdik aımaǵynyń jergilikti jerde shekaralaryn belgileýdi aıaqtaıtyn sońǵy shekaralyq belgi ornatyldy.
Semeı ıadrolyq synaq polıgonynyń jabylǵanyna 35 jyl tolýyna oraı uıymdastyrylǵan is-sharaǵa Qazaqstan Respýblıkasy Atom energııasy jónindegi agenttigi tóraǵasynyń orynbasary Ǵumar Sergazın, Pavlodar oblysy ákimi apparatynyń basshysy Rýslan Muqanov, Maı aýdany ákiminiń orynbasary Ádilet Syzdyqbaev, «Memlekettik korporatsııa «Azamattarǵa arnalǵan úkimet» kommertsııalyq emes aktsıonerlik qoǵamy basqarma tóraǵasynyń orynbasary Ǵalym Qarqynbaev jáne «Qazaqstan Respýblıkasynyń Ulttyq ıadrolyq ortalyǵy» sharýashylyq júrgizý quqyǵyndaǵy respýblıkalyq memlekettik kásiporny bas dırektorynyń mindetin atqarýshy Sergeı Lokshtanov qatysty.
Sońǵy shekaralyq belgi ornatylǵan jerde Qazaqstannyń ıadrolyq synaqtardyń saldaryn joıý jáne burynǵy polıgon aýmaǵynyń qaýipsizdigin qamtamasyz etý boıynsha kópjyldyq jumysyna arnalǵan estelik belgi de ashyldy.
— Semeı ıadrolyq qaýipsizdik aımaǵyn qalyptastyrý — burynǵy polıgon aýmaǵyna qatysty memlekettik saıasattyń túbegeıli jańa kezeńi. Búginde bizdiń mindetimiz — aýmaqtardy táýekel deńgeıine qaraı naqty bólý: qaýipti ýchaskeler memleket tarapynan senimdi baqylaýda qalýy tıis, al qaýipsizdigi ǵylymı zertteýlermen rastalǵan jerler kezeń-kezeńimen sharýashylyq aınalymǵa qaıtarylýy qajet, — dep atap ótti Ǵumar Sergazın.
- Semeı ıadrolyq synaq polıgony jabylǵannan keıin Qazaqstan onyń aýmaǵyn qaýipsiz jaǵdaıǵa keltirý boıynsha aýqymdy jumystar keshenin júrgizdi. Synaq ınfraqurylymy joıyldy nemese qaýipsiz jaǵdaıǵa keltirildi, ıadrolyq qarýdy taratpaý salasynda iri jobalar iske asyryldy, radıatsııalyq ahýalǵa zertteýler jáne aýdany 18 myń sharshy kılometrden asatyn aýmaqqa keshendi radıoekologııalyq zertteý júrgizildi, - delingen habarlamada.
Bul jumystyń ǵylymı-tehnıkalyq negizin Qazaqstan Respýblıkasynyń Ulttyq ıadrolyq ortalyǵy qamtamasyz etti. Kópjyldyq zertteýlerdiń nátıjeleri aýmaqtyń qazirgi radıoekologııalyq jaı-kúıi týraly obektıvti derekter alýǵa jáne ony odan ári paıdalaný tásilderin aıqyndaýǵa múmkindik berdi.
Mańyzdy kezeńderdiń biri 2023 jyly «Semeı ıadrolyq qaýipsizdik aımaǵy týraly» zań qabyldandy. Atalǵan zań burynǵy polıgon aýmaǵyn basqarýdyń jańa tásiliniń quqyqtyq negizin qalyptastyrdy.
- Keshendi ekologııalyq zertteý nátıjeleri boıynsha Semeı ıadrolyq qaýipsizdik aımaǵynyń shekaralary aıqyndaldy. Onyń quramyna radıatsııalyq qaýipter saqtalatyn jáne paıdalanýdyń arnaıy rejımin talap etetin, jalpy aýdany shamamen 8,3 myń sharshy kılometr aýmaqtar kiredi. Sonymen qatar, halyqqa radıatsııalyq qaýip tóndirmeıtin, zerttelgen shamamen 10 myń sharshy kılometr jer kezeń-kezeńimen sharýashylyq aınalymǵa engizilýi múmkin, - delingen agenttik habarlamasynda.
Semeı ıadrolyq qaýipsizdik aımaǵyn qalyptastyrý burynǵy polıgon aýmaǵyn odan ári ońaltý úshin negiz bolady jáne Abaı, Pavlodar jáne Qaraǵandy oblystarynyń tıisti aýmaqtaryn áleýmettik-ekonomıkalyq damytýǵa jaǵdaı jasaıdy.
Aıta ketelik Semeı polıgonynyń jabylǵanyna 35 jyl: Prezıdenttik ortalyqta arnaıy kórme ashylǵany týraly jazǵan edik.
