«Semeı Vodokanal» tutynýshylardyń 479 mln teńgesin qaıtarady
ASTANA. KAZINFORM – Abaı oblysynda sý berý jáne sarqyndy sýlardy burý qyzmetterine tarıfter tómendetilip, tutynýshylarǵa shamamen 479 mln teńge qaıtarylady. Bul týraly Tabıǵı monopolııalardy retteý komıteti habarlady.
2024 jylǵa arnalǵan tarıftik smetalardyń oryndalýyna júrgizilgen taldaý nátıjesinde «Semeı Vodokanal» MKK tarapynan bekitilgen tarıftik smetalardyń 479 mln teńgege jýyq somaǵa oryndalmaǵany anyqtaldy.
Tekserý barysynda sý berý qyzmeti boıynsha tarıftik smetanyń oryndalmaý somasy 375 191,25 myń teńgeni, al sarqyndy sýlardy burý qyzmeti boıynsha 103 706,93 myń teńgeni quraǵan. Anyqtalǵan buzýshylyqtardyń jalpy kólemi Qazaqstan Respýblıkasynyń Ulttyq Banki bazalyq mólsherlemesin eskere otyryp, 478 898,18 myń teńgege jetti.
- Tutynýshylardyń quqyqtaryn qorǵaý jáne qarajatty tarıftik retteý tetigi arqyly qaıtarý maqsatynda 2026 jylǵy 11 aqpandaǵy № 7-OD jáne № 8-OD buıryqtarymen 2026 jylǵy 1 sáýirden bastap bir jyl merzimge ýaqytsha ótemdik tarıf bekitildi.
Sý taratý jelileri arqyly sý berý qyzmeti boıynsha tarıf 11,78%-ǵa tómendetilip, 198,90 teńge/m³-ten 175,48 teńge/m³-ke deıin azaıtyldy. Sarqyndy sýlardy burý qyzmeti boıynsha tarıf 7,08%-ǵa tómendetilip, 137,40 teńge/m³-ten 127,67 teńge/m³-ke deıin qysqartyldy, - delingen aqparatta.
Atalǵan fakt boıynsha «Semeı Vodokanal» MKK-ǵa qatysty QR Ákimshilik quqyq buzýshylyq týraly kodeksiniń 164-baby 4-bóligine sáıkes eki ákimshilik quqyq buzýshylyq isi qozǵaldy. Nátıjesinde kásiporynǵa 13 840 000 teńge mólsherinde aıyppul salyndy.
Aıyppul somasynyń 50%-y jeti táýlik ishinde erikti túrde tólenýine baılanysty is qoldanystaǵy zańnamaǵa sáıkes qysqartylǵan tártippen qaralyp, tólengen qarajat memlekettik bıýdjet kirisine aýdaryldy.
Aıta keteıik, Prezıdent 1 qyrkúıekke deıin temirjol salasyndaǵy jańa tarıf saıasatyna qatysty sheshim qabyldaýdy tapsyrdy.