Semeı túrmesindegi ólim: Birqatar laýazymdy tulǵalar jazalandy

Qylmystyq-atqarý komıteti Abaı oblysyndaǵy túrmede bolǵan oqıǵaǵa qatysty sońǵy aqparatty bólisti, dep habarlaıdy Kazinform.

«Abaı oblysy boıynsha qylmystyq-atqarý júıesi departamenti men prokýratýra Semeıdegi №19 jaza óteý mekemesinde bolǵan jaǵdaıǵa tekserý júrgizdi. Atap aıtqanda, BAQ jáne áleýmettik jelilerde esimi kórsetilgen túrmede jazasyn ótep jatqan azamattardan jaýap alyndy. Tekserý nátıjesinde aıtylǵan faktiler rastalmady», - degen jaýap keldi Іshki ister mınıstrligi Qylmystyq-atqarý komıtetinen Kazinform joldaǵan saýalǵa.

Resmı saýal jaýabynda aıtylǵandaı, 5 qazanda Abaı oblysynyń №19 qaýipsizdigi aralas qylmystyq-atqarý júıesi mekemesinde 2 sottalǵannyń arasynda janjal bolyp, biri alǵan jaraqatynan oqıǵa ornynda qaıtys bolǵan. 

«Atalǵan fakti boıynsha Abaı oblysy polıtsııa departamenti Qylmystyq kodekstiń 99-baby 1-bóligi boıynsha sotqa deıingi tergeýdi bastady. Abaı oblysy boıynsha qylmystyq-atqarý júıesi departamenti qyzmettik tergeý júrgizdi. Onyń qorytyndysy boıynsha birqatar qyzmetker qatań tártiptik jaýapkershilikke tartyldy», - deıdi komıtetten.

Sondaı-aq atalǵan vedomstvo qylmystyq-protsestik kodekstiń talaptaryna sáıkes ózge aqparat jarııalanbaıtynyn eskertti.

Eske salaıyq, Kazinform redaktsııasy osy oqıǵa týraly habar alǵan boıda Abaı oblysy boıynsha QAJD-dan aqparat suraǵan bolatyn.

Alaıda qylmystyq-atqarý júıesi departamenti bul faktini joqqa shyǵarǵan edi. 

Keıin Іshki ister mınıstrligi Abaı oblysyndaǵy túrmede adam ólimi bolǵanyn rastady.