Atyraýdan Oralǵa ushatyn reıs toqtatyldy

ORAL. KAZINFORM — Atyraý men Oral qalalary arasynda qatynap júrgen áýe reısi 1 qarashadan bastap ushpaı qaldy.

Osyǵan oraı Kazinform tilshisi «Oral halyqaralyq áýejaıy» JShS-na arnaıy saýal joldaǵan edi.

Mekemeniń baspasóz qyzmetinen málim etkenindeı, Qazaq Air áýe kompanııasynan Atyraý-Oral baǵytyndaǵy turaqty ushýlar 1 qarashadan 28 naýryzǵa deıin toqtatylady degen habarlama kelgen. 

- Atalmysh reıs aptasyna 4 ret ushyp júrgen. Áýe kompanııasy toqtatý sebebin aıtpady. Sonymen qatar Atyraý-Aqtóbe baǵytyndaǵy reıs te jabyldy, - dep habarlady vedomstvodan. 
Qazirgi kezde Oraldan Astana, Almaty, Aqtaý jáne Qaraǵandy qalasyna áýe reısteri qatynaıdy.

Eske sala keteıik, budan buryn Oral áýejaıynan qatynaıtyn reıster sany artatynyn jazǵan edik.