Semeı turǵynynan myltyq, karabın men oq-dári tárkilendi
SEMEI. QazAqparat – Semeı qalasynda tártip saqshylary er adamnan myltyq, karabın men oq-dárini tárkilendi, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, polıtseılerge JShS-lardyń birindegi qyzmetkerdiń atys qarýyn zańsyz saqtap júrgeni týraly habar túsken.
«Shýaq kentindegi jeke turǵyn úı mańaıynda ornalasqan konteınerdi tintý barysynda Semeı qalasynyń 35 jastaǵy turǵynynan zaýyttyq tásilmen daıyndalǵan jáne atýǵa jaramdy 5,6 kalıbrli karabın tárkilendi. Sondaı-aq 12 mm tegis uńǵyly myltyq pen 2 dana oq-dári tabylǵan. Bul qarý zaýyttyq ádispen jasalǵan jáne atýǵa jaramdy», - dedi ShQO PD bastyǵy Saǵat Mádıev.
Belgili bolǵandaı, qarý-jaraqtar ustalǵan er adamǵa tıesili emes. Tárkilengen zattar «Qylmystyq qarý» jáne «Tirkelgen qarý» bazalary boıynsha tekserildi.
Nátıjesinde, qarý-jaraqtyń esepte joq ekeni anyqtalǵan.
Kúdiktiniń aıtýynsha, karabın oǵan 2007 jyly qaıtys bolǵan marqum atasynan qalǵan.
Qazirgi ýaqytta atalǵan fakti boıynsha QR QK 287-baby 3-bóligine sáıkes sotqa deıingi tergeý amaldary júrgizilýde.
