Semeı turǵynyn urlyq jasaýǵa májbúrlegen polıtseıler sottaldy
SEMEI. QazAqparat - Búgin semeılik polıtsııa qyzmetkerlerine qatysty sot úkimi shyqty, dep habarlaıdy QazAqparat.
Іs materıaldaryna saı, ótken jyldyń qyrkúıek aıynda ortalyq polıtsııa bóliminiń qyzmetkerleri qylmystyń ashylý kórsetkishin kóterý maqsatynda buryn sotty bolǵan azamatty brend kıimder dúkenin tonaýǵa májbúrlegen. Alaıda er adam bul usynystan bas tartqan. Polıtsııa qyzmetkerleri tipten aqsha usynǵan kórinedi. Semeı turǵyny oǵan da kónbegen. Ilikpegen «uryny» kóndirý úshin úshinshi adamdy shaqyrtýǵa týra kelgen. Ol - burynǵy polıtsııa qyzmetkeri. Óz kezeginde ol istiń mán-jaıyn uǵynyp, birden «áreketke» kirisken. Jábirlenýshini ábden qorqytyp, kúsh qoldaný arqyly urlyq jasatqan. Sáıkesinshe, uryny oqıǵa ornynda ustaǵandaı keıip tanytqan.
Alaıda, oqıǵa olar qurǵan josparmen júzege aspady. Tergeýdi bul iske qatysy joq polıtsııa qyzmetkeri júrgizgen. Osy jerde aqıqattyń beti ashylady. Tergeý barysynda ustalǵan azamattyń kinásizdigi anyqtalyp, úsh polıtseıge aıyp taǵyldy.
«Semeı qalalyq №2 sotynyń sheshimimen úsh azamat kináli dep tanylyp, 5 jylǵa bas bostandyqtarynan aıyryldy. Sondaı-aq, sottalǵandar ómir boıy memlekettik qyzmette jumys isteı almaıdy. Úkim zańdy kúshine engen joq»,-dedi Semeı qalalyq №2 sotynyń baspasóz qyzmetinen.
