Semeı turǵynyn pyshaqtap tastaǵan astanalyq ustaldy
SEMEI. QazAqparat – Semeıde eki er adam arasynda janjal shyǵyp, olardyń biri pyshaq jaraqatymen aýrýhanaǵa tústi, dep habarlaıdy QazAqparat tilshisi.
Shyńys Qazaqstan oblystyq Polıtsııa departamentiniń málimetine súıensek, 20 qyrkúıek kúni tańerteń 102 arnasyna qońyraý shalǵan áıel Shákárim dańǵylyndaǵy úıdiń aýlasynda tóbeles bolǵandyǵy týraly habarlaǵan. Oqıǵa ornyna birden tártip saqshylary attandy. Polıtseıler jaralanǵan 34 jastaǵy er adamdy Naımanbaev kóshesindegi dámhananyń janynan tapqan.
«Polıtsııa qyzmetkerleri kýágerlermen sóılesip bolǵan soń, dereý qylmyskerdi izdeýge kiristi. Sol kúni kúdikti retinde esh jerde jumys istemeıtin, buryn sottalǵan Nur-Sultan qalasynyń 24 jastaǵy turǵyny ustalyp, polıtsııa bólimshesine jetkizildi. Ol óz kinásin moıyndap otyr», - dep habarlady vedomstvo ókilderi.
Belgili bolǵandaı, ereges sózge kelispeýshilikpen týyndaǵan. Ashýǵa býlyqqan kúdikti jábirlenýshiniń ish tusyna pyshaq suǵyp jibergen. Qazirgi ýaqytta Qazaqstan Respýblıkasy Qylmystyq kodeksiniń 106-baby 2-bóligi boıynsha sotqa deıingi tergeý amaldary júrgizilýde.
