Semeı turǵyny súıiktisiniń atyna úsh nesıe alǵan
SEMEI. QazAqparat – Semeıde súıiktisiniń atyna úsh nesıe alǵan er adam tergelip jatyr. Bul týraly QazAqparat qalalyq Polıtsııa basqarmasynyń baspasóz qyzmetine silteme jasap habarlaıdy.
«Kelinshek Zaton polıtsııasy bólimine alaıaqtyq faktisi jóninde aryzdandy. Ol 3 qazan kúni belgisiz adamdar onyń atyna «Money man», «Shyn sóz», «Vıkı» saıttary arqyly 538 000 teńgege 3 onlaın-nesıe rásimdegenin aıtty», - dedi vedomstvodan.
Jedel izdestirý sharalarynyń barysynda polıtsııa qyzmetkerleri alaıaqty izin sýytpaı qolǵa túsirdi. Belgili bolǵandaı, nesıeni zardap shekken áıelmen birge turatyn 31 jastaǵy er adam rásimdegen. Ol kelinshektiń qujattarynyń rekvızıtteri men bank kartasynyń nómirin paıdalanǵan.
Atalmysh derek QR QK-niń 190-baby boıynsha Sotqa deıingi tergeýdiń biryńǵaı tizilimine tirkeldi. Sotqa deıingi tergeý júrip jatyr.
