Semeı turǵyny Reseıden arzan kólik jetkizip berem degen alaıaqqa 1 mln teńgesin bere salǵan
SEMEI. QazAqparat – Semeı qalasynyń turǵyny Reseıden arzanǵa kólik jetkizip beretinin aıtqan alaıaqqa senip, 1 mln teńgesinen aıyryldy, dep habarlaıdy QazAqparat tilshisi.
Shyǵys Qazaqstan oblystyq Polıtsııa departamenti baspasóz qyzmetiniń málimetine súıensek, polıtsııaǵa habarlasqan 36 jastaǵy er adam shilde aıynyń basynda Reseıden arzan kólik jetkizip beretinin aıtqan belgisiz bireýge 1 mln teńge aqsha bergen. Alaıda keıinnen alaıaqtyń arbaýyna túskenin túsindi.
«Jedel-izdestirý sharalaryn júrgizý barysynda tártip saqshylary kúdiktini qolǵa túsirdi. 39 jastaǵy Semeı turǵyny óz kinásin tolyqtaı moıyndap otyr. Belgili bolǵandaı, alaıaq jábirlenýshiniń aqshasyn jeke qajetine jumsap úlgergen», - dep habarlady vedomstvo ókilderi.
Qazirgi ýaqytta atalǵan fakti boıynsha QR Qylmystyq kodeksiniń 190-baby 1-bóligi (Alaıaqtyq) boıynsha sotqa deıingi tergeý amaldary júrgizilýde.
