Semeı turǵyny balaǵa járdemaqy rásimdeý úshin alaıaqqa 200 myń teńge bergen

SEMEI. QazAqparat – Semeı qalasynyń turǵyny balaǵa járdemaqy rásimdeýge kómektesetindigin aıtqan alaıaqqa aldanyp, 200 myń teńgesinen aıyryldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, «102» jedel arnasyna 39 jastaǵy turǵyn habarlasqan. Óz sózinde ol ortalyq bazardaǵy beıtanys áıeldiń «balaǵa járdemaqy alý úshin qujattardy daıyndaýǵa kómektesemin» dep onyń 200 000 teńgesin alǵanyn jetkizdi.

«Jedel-izdestirý sharalaryn júrgizgen krımınaldyq polıtsııa qyzmetkerleri 27 jastaǵy kúdiktini qolǵa túsirdi. Ol kinásin moıyndap, aqshany óz qajettilikterine jumsap tastaǵanyn aıtty», - dedi ShQO PD bastyǵy Saǵat Mádıev.

Qazirgi ýaqytta atalǵan fakti boıynsha QR QK-niń 190-baby 1-bóligine sáıkes sotqa deıingi tergeý amaldary júrgizilýde.