Semeı turǵyny avtobýsta 3 mln teńge salynǵan sómkesin umytyp ketken
SEMEI. QazAqparat – Semeı qalasynyń polıtsııa qyzmetkerleri áıel adamǵa avtobýsta umytyp ketken 3 mln teńge salynǵan sómkesin qaıtaryp berdi, dep habarlaıdy QazAqparat tilshisi.
Qalalyq Polıtsııa basqarmasy baspasóz qyzmetiniń málimetine súıensek, 10 qańtarda «102» arnasyna habarlasqan 38 jastaǵy qala turǵyny №35 avtobýsta iri kólemdegi aqsha salynǵan qara sómkesin umytyp ketkenin aıtqan.
«Óz sózinde ol Vodnyı kentindegi aıaldamadan túskenin, avtobýs qala baǵytyna ketip qalǵanyn jetkizdi. Kózine jas kelgen áıel avtobýstyń sońynan júgirgen. Habar túsken soń qoǵamdyq tártipti qadaǵalaıtyn barlyq polıtseıler avtobýsty izdeýge jumyldyryldy», - dep habarlady vedomstvo ókilderi.
Kóp uzamaı avtobýstyń nómiri jáne qaıda kele jatqany anyqtalǵan. Qoǵamdyq kólik «TsÝM» mańynda toqtatylǵan soń polıtseıler aqsha salynǵan sómkeni tapty. Sómke dereý jábirlenýshige qaıtaryldy. Barlyq zattar men aqsha ornynda bolyp shyqty.
