Semeı turǵyny alaıaqqa aldanyp 3 mln-ǵa jýyq aqshasynan aıyryldy
SEMEI. QazAqparat –Semeı qalasynyń turǵyny alaıaqqa 2 800 000 teńge bergen, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Áýezov polıtsııa bóliminiń «102» jedel arnasyna 25 jastaǵy turǵyn habarlasqan. Óz sózinde ol tanysy 2020 jyldyń naýryz aıynda nesıe resimdeýge kómektesetindigin aıtyp, 2 800 000 teńge suraǵanyn jetkizdi. Oıyna esh sekem kelmegen azamat sol somany bere salǵan.
«Jedel izdestirý sharalaryn júrgizý barysynda krımınaldyq polıtsııa qyzmetkerleri 27 jastaǵy kúdiktini qolǵa túsirdi. Ol óz kinásin moıyndap otyr», - dedi ShQO PD bastyǵy Saǵat Madıev.
Qazirgi ýaqytta atalǵan fakti boıynsha QR QK-niń 190-baby 1-bóligine sáıkes sotqa deıingi tergeý amaldary júrgizilýde.
