Semeı turǵyndary málimetti burmalap 11 páterdi zańsyz ıelenip ketken
SEMEI. QazAqparat - ShQO prokýratýrasy jumyspen qamtý salasynan 12 myńnan astam zańbuzýshylyqty anyqtady. Bul týraly QazAqparat Shyǵys Qazaqstan oblysynyń prokýratýrasyna silteme jasap habarlaıdy.
Oblys prokýratýsy «Jumyspen qamtý jol kartasy» jáne «Ónimdi jumyspen qamtýdy jáne jappaı kásipkerlikti damytý» memlekettik baǵdarlamalardy júzege asyrýǵa bólingen bıýdjettik qarajatty jumsaý zańdylyǵyna tekserý júrgizdi. Nátıjesinde jalǵan jumys oryndaryn qurý, eńbek naryǵyna laıyqsyz monıtorıng júrgizý, azamattardy talap etilmeıtin mamandyqtarǵa oqytý faktileri anyqtaldy.
ıAǵnı, 1,5 mlrd teńge tıimsiz jumsalǵan. Prokýrorlyq tekserý zaem alýshylardyń nesıeni maqsatsyz paıdalanýynyń 20-dan astam faktisin anyqtap, olardyń barlyǵyna aqshalaı qarajatty merzimnen buryn qaıtarý týraly talaptar joldandy.
«Mysaly, T. degen azamat 15 iri qara mal satyp alýǵa jeńildikpen alǵan 3 mln teńgeni ózine jyljymaıtyn múlik satyp alýǵa jumsaǵan. Endi ol atalmysh somany qaıtarýy tıis. Al «Aýyl sharýashylyǵyn qoldaý qarjy Qory» AQ fılıaly ózderiniń qyzmetin salyq organdarynda tirkemegen 24 azamatqa 51 mln teńgeden astam qarajatty negizsiz bergen. Sondaı-aq, 37 zaem alýshy iri qara malyn satyp alý úshin 82 mln teńgeden astam nesıe alyp, bir aıdan keıin óz kásipkerlik qyzmetin toqtatqan. Taǵy bir oblys turǵyny 1,5 mln teńge nesıe alyp, 29 kúnnen keıin salyq organdarynyń esebinen shyǵyp ketken» delingen habarlamada.
Budan basqa, ýákiletti organǵa jalǵan qujattar men málimetterdi berý arqyly jumysqa jalǵan ornalasýǵa qatysty 39 oqıǵa anyqtaldy. Keltirilgen zalal 6 mln teńgeni qurady, onyń 2 mln teńgesi bıýdjetke qaıtarylǵan. Qalǵan soma boıynsha sotqa deıingi tergeý júrgizilýde. Halyqty kóshirý baǵdarlamalaryn tekserý kezinde de kóptegen zańbuzýshylyqtar anyqtaldy.
Atap aıtqanda, Semeı qalasynyń jumyspen qamtý ortalyǵyna Aınabulaq, Znamenka, Tańat jáne Prırechenskoe aýyldyq okrýgterinen oblys ishinde kóshý týraly 11 ótinish túsken. Alaıda, kóshi-qon polıtsııasy men ákimdikterdiń málimeti boıynsha, atalǵan aýyldarda ondaı otbasylar buryn turmaǵan. Olar aýyldyq okrýgke ótinish bererden birneshe kún buryn tirkelgen.
Sóıtip, olarǵa memlekettik turǵyn úı qorynan jalpy quny 96 mln teńgeni quraıtyn 11 páter zańsyz berilgen. Olardy qaıtarý maqsatynda qala ákimdigine qadaǵalaý aktileri engizildi.
