Semeı turǵynyn aldamaq bolǵan alaıaqtar birden úsh memlekettik organ atyn jamylǵan

SEMEI.KAZINFORM — Semeı qalasynda telefon arqyly jasalǵan erekshe alaıaqtyqtyń joly kesildi.

Alaıaqtar bir ýaqytta úsh memlekettik organnyń atyn jamylǵan. Atap aıtqanda, Biryńǵaı jınaqtaýshy zeınetaqy qory, HQKO jáne kıberpolıtsııa.

— Aldymen áıel adamǵa ózin zeınetaqy qorynyń qyzmetkeri retinde tanystyrǵan belgisiz adam qońyraý shalyp, «zeınetaqy aýdarymdarynyń toqtatylǵanyn» habarlaıdy. «Tirkeýden ótkizip beremin» degen ol enbek.kz servısiniń elektrondy kezegine arnalǵan alty tańbaly SMS-kodty aıtýyn talap etken. Kókeıine kúmán kelgen semeılik onyń talabyn oryndamaǵan, — dep habarlady Abaı oblystyq Polıtsııa departamentinen.

Alaıaqtar keıin kelesi qadamǵa kóshti. Vıdeoqońyraý arqyly ózin «kıberpolıtsııa qyzmetkerimin» dep tanystyrǵan adam áıeldiń eGov akkaýyn buzýǵa baǵyttalǵan «kıbershabýyl» jóninde aıtyp, «málimetterdi tekserý úshin HQKO-ǵa joldaıtynyn» habarlaǵan.

— Kóp uzamaı «HQKO qyzmetkeri» qońyraý shalǵanymen, áıel qylmystyq nıetti ańǵaryp, sóılespeı qoıǵan. Osydan keıin alaıaqtar qaıta polıtsııa atynan habarlasyp, psıhologııalyq qysym kórsetýge tyrysqan. Oǵan ákimshilik aıyppul nemese tipti úsh jylǵa deıin bas bostandyǵynan aıyrý jazasymen qorqytqan. Alaıda áıel adam alaıaqtarmen sóılesýdi toqtatyp, bul jóninde polıtsııaǵa habarlaıtynyn eskertken. Osylaısha alaıaqtardyń aılasy iske aspaı qaldy, — delingen aqparatta.

Eske salsaq, osyǵan deıin Abaı oblysynda alaıaqtar halyqty aldaýdyń jańa ádisine kóshkeni habarlanǵan.