Semeı turǵyny TikTok efıri úshin 5 táýlikke qamaldy
ASTANA. KAZINFORM — Abaı oblysynda TikTok jelisindegi tikeleı efır kezinde bylapyt sóz aıtyp, alkogol ishken 53 jastaǵy Semeı turǵyny ákimshilik jaýapkershilikke tartyldy.
Polıtsııa áleýmettik jelilerge monıtorıng júrgizý barysynda áıeldiń tikeleı efırin anyqtaǵan. Efırdi shamamen 12 myń adam kórgen. Kadrlarda áıel adamnyń bylapyt sózder aıtyp, alkogoldik ishimdik ishkenin ádeıi kórsetkeni jáne aınalasyndaǵylarǵa qurmetsizdik tanytqany baıqalǵan.
Polıtsııa onyń jeke basyn jedel anyqtady. Ol Semeı qalasynyń 53 jastaǵy turǵyny Mádına Baıahmetova bolyp shyqty.
Sot áıeldi usaq buzaqylyq jasaǵany úshin kináli dep tanyp, 5 táýlikke ákimshilik qamaýǵa aldy. Polıtsııa onyń jasy eskerilgenin habarlady.
Quzyrly organ áleýmettik jelidegi tikeleı efırler de zań talaptarynan tys qalmaıtynyn eskertti. Bylapyt sóz aıtý, ádepsiz minez-qulyq tanytý jáne qoǵamdyq tártipti buzý zańda belgilengen jaýapkershilikke ákelýi múmkin.
Eske salaıyq, buǵan deıin Qaraǵandyda TikTok-taǵy áreketi úshin 56 jastaǵy strımer 10 táýlikke qamalǵanyn habarlaǵan edik.
