Semeı turǵyny «órtten 18 adam qaza tapty» degen jalǵan aqparat taratqany úshin jazalandy
SEMEI. KAZINFORM - Abaı oblysynda sot órt kezinde qaza tapqandar týraly jalǵan aqparat taratqan áıeldi jaýapqa tartty.
2026 jyldyń 3 naýryzynda Semeı qalasyndaǵy «Balapark» balalar oıyn-saýyq ortalyǵynda órt shyqqan bolatyn. Tótenshe qyzmetterdiń jedel is-qımylynyń arqasynda adam shyǵyny bolǵan joq.
Alaıda Semeı qalasynyń turǵyny Instagram jelisindegi qalalyq pablıkterdiń birinde órt saldarynan 18 adam qaza boldy degen jalǵan aqparat jarııalaǵan.
Abaı oblysy prokýratýrasynyń málimetinshe, mundaı jalǵan aqparattyń taralýy turǵyndar arasynda alańdaýshylyq týǵyzyp, qoǵamdyq tártiptiń buzylýyna ákelýi múmkin bolǵan.
Quqyq buzýshynyń kim ekeni jedel anyqtalyp, oǵan qatysty ákimshilik is qozǵalǵan. Sot otyrysy barysynda áıel óz kinásin moıyndady.
Sot qaýlysymen ol jalǵan aqparat taratqany úshin QR ÁQBtK-niń 456-2-baby 3-bóligi boıynsha kináli dep tanylyp, 86 500 teńge kóleminde aıyppul tóleýge mindetteldi.
Qaýly áli zańdy kúshine engen joq.
Abaı oblysynyń prokýratýrasy tótenshe jaǵdaılar kezinde jalǵan aqparat taratýǵa jol berilmeıtinin jáne mundaı áreketterge barǵanda zań aıasynda jaýapkershilikke tartylatynyn eskertti.
Eske salsaq, osyǵan deıin Almatyda jańa Konstıtýtsııaǵa qatysty feık taratqan turǵyn jazalanǵany habarlanǵan.
