Semeı turǵyny araldan Qyzyl kitapqa engen birqazandy taýyp aldy

SEMEI. KAZINFORM – Semeı qalasynyń turǵyny Beıbitshilik aralynan Qyzyl kitapqa engen birqazandy taýyp, polıtsııaǵa tapsyrdy. 

Oblystyq polıtsııa departamenti baspasóz qyzmetiniń málimetine súıensek, tártip saqshylaryna aralda tabylǵan sırek kezdesetin birqazan týraly aqparat túsken.

– Azamattardyń ótinishine tabıǵatty qorǵaý polıtsııasynyń qyzmetkerleri jedel áreket etti. Inspektorlar bıologııalyq ortalyqtyń mamandarymen birden baılanysyp, birqazandy ári qaraı tekserý jáne kútim jasaý úshin tıisti orynǵa jetkizdi, - delingen aqparatta. 

Mamandar birqazandy tekserip, ony jyly orynǵa ornalastyrdy. Qazirgi ýaqytta qusqa qajetti kútim jasalyp, jaǵdaıy turaqty baqylaýǵa alynǵan. Qyzyl kitapqa engen qanattynyń tolyq qalpyna kelýine barlyq jaǵdaı qarastyrylǵan.

– Jabaıy janýarlar men qustardy, ásirese sırek kezdesetin túrlerin tapqan jaǵdaıda, olardy óz betimen tasymaldaýǵa tyryspaı, dereý mamandarǵa nemese polıtsııaǵa habarlaý qajet. Bul olardyń ómirin saqtap qalýǵa múmkindik beredi, - delingen habarlamada. 

Eske salsaq, osyǵan deıin ShQO-da Qyzyl kitapqa engen sırek jarqanat kózge túskeni habarlanǵan.