Semeı synaq polıgony jerlerinde erekshe quqyqtyq mártebesi bar arnaıy aımaq qurylmaq
ASTANA. QazAqparat – Semeı synaq polıgony jerlerinde erekshe quqyqtyq mártebesi bar arnaıy aımaq qurý josparlanǵan. Bul jaıynda Senat depýtatynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.
«Sizdiń burynǵy Semeı synaq polıgonynyń aýmaǵyn qaýipsiz kúıge keltirýdi jáne onyń ınfraqurylymyn damytýdy is júzinde iske asyrý jónindegi is-sharalar josparyna (budan ári – SıASP/Jospar) 2022-2023 jyldarǵa jer ýchaskelerin sharýashylyq aınalymǵa berýdiń naqty merzimderin belgileý bóliginde ózgerister engizýge qatysty depýtattyq saýalyńyzdy qarap, mynany habarlaımyn. Jospardyń 6-tarmaǵynda 2030 jylǵa deıin jergilikti atqarýshy organdarǵa SıASP jerleriniń bir bóligin sharýashylyq aınalymǵa berýdi eskere otyryp, onyń jerleriniń jáne oǵan irgeles aýmaqty keshendi ekologııalyq zertteý nátıjeleri boıynsha SıASP shekaralaryn jańartý kózdelgen», - dedi Úkimet basshysy.
Onyń atap ótýinshe, 2021 jyly burynǵy SıASP aýmaǵyn keshendi ekologııalyq zertteý boıynsha kópjyldyq jumystar aıaqtaldy. SıASP aýmaǵyn zertteý radıoaktıvti lastanýdyń jergilikti sıpatqa ıe ekendigi jáne búkil SıASP aýmaǵyna taralmaıtyndyǵy týraly túsinik qalyptastyrýǵa múmkindik berdi.
«Sonymen qatar SıASP-tan tys jerlerde de qorshaǵan orta obektilerindegi radıonýklıdter mólsheri deńgeıiniń artýy baıqalatynyn atap kórsetý qajet. Zertteý nátıjesinde radıoaktıvti zattardyń aǵymdaǵy jáne yqtımal taralýynyń negizgi joldary men tetikteri de anyqtaldy. SıASP-tyń anyqtalǵan shekaralary naqty radıoaktıvti lastanýǵa sáıkes kelmeıtinin atap ótken jón», - dedi Premer-Mınıstr.
Úkimet basshysynyń dereginshe, Energetıka mınıstrligi SıASP aýmaǵyndaǵy lastanǵan aýmaqtardyń ıadrolyq jáne radıatsııalyq qaýipsizdigin qamtamasyz etýge baǵyttalǵan keıingi mindetterdi sheshý úshin «Semeı ıadrolyq qaýipsizdik aımaǵy týraly» Qazaqstan Respýblıkasy Zańynyń jobasyn ázirledi.
Zań jobasy aıasynda normatıvten artyq lastanǵan jerlerdi qamtıtyn SıASP jerlerinde erekshe quqyqtyq mártebesi bar arnaıy aımaq qurý josparlanǵan. Qazirgi ýaqytta zań jobasy Qazaqstan Respýblıkasy Parlamenti Májilisiniń qaraýynda. Atalǵan aımaqtyń shekarasy men aýdanyn negizdeıtin materıaldarǵa memlekettik ekologııalyq saraptama júrgizilgennen keıin osy aımaqtyń shekaralary men aýdany belgilenetin bolady», - dedi Álıhan Smaıylov.
