Semeı synaq alańynda áskerı qyzmetin ótegen azamattar áleýmettik kómek ala almaı júr - B. Smaǵul
ASTANA. QazAqparat - Semeı synaq alańynda áskerı qyzmetin ótegen azamattar áleýmettik kómegin ala almaı júr. Búgin Parlament Májilisinde Úkimet basshysynyń atyna saýal joldaǵan depýtat Baqytbek Smaǵul osy máseleni kóterdi.
«Qazirgi tańda elimizde áleýmettik qoldaýdy qajet etetin toptardyń qatarynda Uly Otan soǵysy jáne Aýǵan soǵysy ardagerlerimen birge, Chernobyl apaty zardabyn joıýǵa qatysqan jáne Semeı synaq alańynda áskerı qyzmetin ótegen azamattar da bar. Qoldanystaǵy zańǵa sáıkes, ıadrolyq synaqtar men jattyǵýlarǵa tikeleı qatysqan adamdar Uly Otan soǵysyna qatysýshylarǵa áleýmettik kepildik jaǵynan teńestirilgen. Alaıda, ondaı sanattaǵy kópshilik azamattar áleýmettik kómek pen synaq alańynda bolǵandyǵy úshin taǵaıyndalǵan aı saıynǵy arnaýly memlekettik járdemaqysyn ala almaı júr», - dedi depýtat.
Onyń sózine qaraǵanda, járdemaqy alý úshin beriletin anyqtamany Qazaqstan azamattary 2008 jylǵa deıin Reseıdiń Podolsk qalasynyń ortalyq muraǵatynan, ortalyq áskerı komıssarıat arqyly alyp kelgen. 2008 jyldan keıin Reseı bundaı anyqtama berýdi toqtatqan. Al anyqtamany alyp úlgermegender de barshylyq. «Esesine, qazirgi tańda Qazaqstan Respýblıkasynyń Qorǵanys mınıstrligi ortalyq muraǵatynan «Semeı synaq alańynda qyzmette boldy» degen anyqtama berilgenimen, ony elimizdiń áleýmettik qoldaý mekemeleri qabyldamaıdy. Munda aqylǵa syımaıtyn túsiniksiz jaıt bar. Biz - qazir álem moıyndaǵan táýelsiz memleketpiz. Semeı synaq polıgony Qazaqstan aýmaǵynda 40 jyl boıy atom synaqtaryn jasaǵany da shyndyq. Endi sol synaq polıgonynda áskerı qyzmet ótegeni jónindegi anyqtamany Qazaqstannyń jaýyngerleri nege basqa shet memleketten alýy kerek?» - deıdi Baqytbek Smaǵul.
Onyń aıtýynsha, Qazaqstannyń Qorǵanys mınıstrliginiń berip otyrǵan anyqtamanyń jaramsyz bolýy da túsiniksiz. Soǵan oraı, depýtat osy máseleni sheshýdiń qajettiligin alǵa tartty.
