Semeı: Soqqy jegen jedel járdem qyzmetkeri ádildik tappaı júr
SEMEI. QazAqparat - Semeıde jedel járdem qyzmetiniń feldsheri Larısa Nıkýshkına ózine qol kótergen azamattyń ústinen jazǵan aryzynyń qaraýsyz jatqanyna shaǵymdandy, dep habarlaıdy QazAqparat.
Eske sala keteıik, sáýir aıynyń 26-synan 27-ine qaraǵan túni semeılik turǵyn naýqastanyp jatqan 2 jastaǵy balasyna jedel járdem qyzmetin shaqyrady. Al brıgada kelgen ýaqytta balanyń ákesi «keshiktińder» dep feldsherdi balaǵattap, qol jumsaǵan bolatyn.
ІІІ dárejeli dene jaraqattaryn alǵan feldsher Larısa Nıkýshkına Áýezov polıtsııa bólimine azamattyń ústinen aryz túsiredi. Biraq is áli kúnge deıin qaraýsyz jatyr. Qalalyq Іshki ister basqarmasynyń bastyǵy Dýlat Qazaqpaev «Nur Otan» partııasynyń fılıalynda ótkizgen qoǵamdyq qabyldaýǵa kelgen feldsher quqyq qorǵaý organdarynyń jumysyna kóńili tolmaıtynyn jetkizdi.
«Meni polıtsııa qyzmetkerleriniń jumysy tańǵaldyrdy. Tipti aryzymdy qabyldaǵylary da kelmedi. Jazǵan aryzyma baılanysty bólim polıtseıleri eshqandaı jumys atqaryp jatqan joq», - deıdi Larısa.
Dýlat Qazaqpaev máseleni baqylaýǵa alyp, jaqynda sheshiletinin aıtty.
«Máselenińizdi tolyq qaraıtyn bolamyz. Barlyǵy zań aıasynda sheshiletin bolady. Azamattan jaýap alyp, barlyǵyn teksergennen keıin habaryn beretin bolamyz», - dedi shahardyń bas polıtseıi.
