Semeı polıgonynyń 100 gektardan astam jeri «Qazmyrysh» kompanııasyna berilmek

ASTANA. QazAqparat – Premer-Mınıstr Álıhan Smaıylov «Shyǵys Qazaqstan oblysynyń burynǵy Semeı ıadrolyq synaq polıgonynyń aýmaǵynda jer ýchaskelerin aýystyrý jáne berý týraly» Úkimet qaýlysyna qol qoıdy, dep habarlaıdy QazAqparat tilshisi.

«Abaı oblysynyń burynǵy Semeı ıadrolyq synaq polıgonynyń aýmaǵyndaǵy bosalqy jer sanatynan aýdany 119,03 gektar jer ýchaskeleri ónerkásip, kólik, baılanys, ǵarysh qyzmetiniń, qorǵanystyń, ulttyq qaýipsizdiktiń muqtajy úshin jáne aýyl sharýashylyǵyna arnalmaǵan ózge de maqsattar úshin jer sanatyna aýystyrylsyn.

«Qazmyrysh» jaýapkershiligi shekteýli seriktestigine osy qaýlynyń 1-tarmaǵynda kórsetilgen jer ýchaskelerin kásiporynnyń ónerkásiptik qaldyqtar polıgonyn salý jáne paıdalaný úshin 2039 jylǵa deıingi merzimge ýaqytsha paıdalaný (jalǵa alý) quqyǵy berilsin», - delingen Álıhan Smaıylov qol qoıǵan qaýlyda.

Qaýly 2024 jyldyń 1 qańtarynan bastap kúshine enedi.