Semeı polıgonyndaǵy ıadrolyq synaqtardan zardap shekken azamattardy áleýmettik qorǵaý máselelerin jetildire túsý qajet - N. Sábılıanov
ASTANA. Sáýirdiń 19-y. QazAqparat /Qanat Mámetqazyuly/ - Semeı polıgonyndaǵy ıadrolyq synaqtardan zardap shekken azamattardy áleýmettik qorǵaý máselelerin jetildire túsý qajet.
Bul rette qoldanystaǵy zańnamaǵa túzetýler engizý kerek. Búgin QR Parlamenti Májilisinde «Qazaqstan - beıbitshilik eli» taqyrybynda ótken dóńgelek ústel barysynda Májilis depýtaty Nurtaı Sabılıanov osylaı málim etti, dep habarlaıdy QazAqparat.
Depýtattyń aıtýynsha, «Semeı ıadrolyq polıgonyndaǵy ıadrolyq synaqtardan zardap shekken azamattardy áleýmettik qorǵaý týraly» qoldanystaǵy zań 1992 jylǵy jeltoqsannyń 18-inde qabyldanǵan. Atalmysh zańda kópjyldyq ıadrolyq jarylystardyń áserinen zardap shekken azamattardyń mártebesi men aýmaqtardy túr-túrge bólip belgileý, ótemder, jeńildikter túrleri, aýmaqty áleýmettik-ekonomıkalyq damytý jónindegi sharalar aıqyndalǵan. N. Sábılıanovtyń pikirinshe, osy zań qabyldanǵannan keıingi jyldary memleket ózine alǵan mindettemelerin jyl saıyn oryndal keledi.
«Elbasy byltyrǵy jyly tikeleı jeli arqyly halyqpen suhbattasqanda Semeı polıgonynyń zardaptaryn joıýǵa qatysty aıtqan usynystaryna halyq ta rızashylyǵyn bildirgen bolatyn. Bul rette Parlament depýtattary «Semeı ıadrolyq polıgonyndaǵy ıadrolyq synaqtardan zardap shekken azamattardy áleýmettik qorǵaý týraly» zańdy odan ári jetildire túsýimiz kerektigi aıqyndalyp otyr. Atap aıtqanda, óńirdegi azamattardy zeınetaqymen qamtamasyz etýdi qaıta qarastyrý qajet. Máselen, qoldanystaǵy zańǵa sáıkes Semeı polıgony óńirinde ómir súrgen er azamattar 50 jasta, áıelder 45 jasta zeınetkerlikke shyǵady eken ári dál osy jasta zeınetke shyǵý úshin polıgon aımaǵynda on jylǵa jýyq turǵan bolýy shart eken. Bul durys emes, óıtkeni qazir polıgonnan zardap shekken, keıinen basqa jaqqa kóship ketken azamattar da bar. Sol apatty óńirde 9-8 jyl nemese 3-4 jyl turǵandary da bar. Olar da polıgon qasiretin tartyp otyr, biraq jańaǵydaı jeńildikterdi paıdalana almaıdy», dedi depýtat.
Onyń aıtýynsha, zańda medıtsınalyq-áleýmettik kómekter túrin de jetildire túsken oryndy. Budan bólek N. Sabılıanov Semeı óńirindegi aýyldyq jerlerdiń ınfraqurylymyn damytý, aýyzsý problemalaryna da basa nazar aýdarý qajettigin alǵa tartty.
