Semeı polıgonynda áskerı boryshyn ótegender «ardager» mártebesin surap otyr

NUR-SULTAN. QazAqparat – Kezinde Semeı ıadrolyq synaq polıgonynda áskerı mindetin ótegen qazaqstandyq sarbazdar, olarǵa «ardager» mártebesin berip, áleýmettik jaǵdaı jasaýdy talap etip otyr, dep habarlaıdy QazAqparat tilshisi.

«Búgin elimizdiń ár óńirinen Semeı polıgonynda áskerı mindetin ótegen sarbazdar bas qosyp otyrmyz. Jınalýdaǵy maqsatymyz – Úkimetke, quzyrly organdarǵa únimizdi jetkizgimiz keledi. Biz kezinde Semeı polıgonynda áskerı mindetin ótegen sarbazdarǵa «ardager» arnaıy mártebesin berse eken deımiz. Biz 2 jyl boıy Semeı polıgony aýmaǵynda áskerı boryshymyzdy ótedik. Tıisti deńgeıde kóńil bólinip, memleket tarapynan qajetti áleýmettik kómek kórsetilýin talap etemiz.

Mysaly, Chernobylda bolǵan mamandarǵa 2 kún bolsa da, tıisti deńgeıde áleýmettik tólemderdi óteıdi. Al biz 2 jyl ómirimizdi Semeı polıgonynda ótkizdik. Búginde Semeıde áskerı boryshyn ótegenderdiń aldy 70-te, arty 50 jasqa keldi», - QR Semeı ıadrolyq synaq polıgony erekshe táýekel etýshiler bóliminiń ardagerleri men múgedekteri birlestiginiń tóraǵasy Erjan Dúısenbaev.

Onyń aıtýynsha, Semeı polıgonynda áskerı mindetin ótegen jandar osyǵan deıin de quzyrly organdarǵa talap-tilekterin jetkizgen.

«Kóbisiniń densaýlyǵy syr berip jatyr. Jas kelgen saıyn ońaı emes, ońaltýdy talap etedi. Ákimdik, mınıstrlikterge habarlasqanymyzda arnaıy jumys toby bar, máseleni qarastyryp jatyrmyz degen jaýap aldyq. Búgingi sharaǵa biraz óńirden ókilder kelip otyr. Qorǵanys, Eńbek jáne halyqty áleýmettik qorǵaý, Densaýlyq saqtaý mınıstrligine arnaıy hat joldap, búgingi jıynǵa shaqyrdyq. Arnaıy márteden bólek, áleýmettik jaǵdaı jasalsa deımiz. Keıbir óńirde arnaıy áleýmettik tólem beriledi, al keı aımaqta múldem eshteńe tólenbeıdi. Nege bulaı? Zań ortaq emes pe?», - deıdi ol.

Sondaı-aq, bıyl aqpanda Semeı polıgonynda áskerde bolǵan jandar birigip respýblıkalyq deńgeıde birlestik qurǵan eken.