Semeı polıgonyna jatatyn jerler jaqyn arada aýyl sharýashylyǵyna qaıtarylady - Qorshaǵan ortany qorǵaý mınıstri
ASTANA. Qarashanyń 20-sy. QazAqparat /Jasulan Amanbaıuly/ - Semeı polıgonyna jatatyn jerler jaqyn arada aýyl sharýashylyǵyna qaıtarylady. Bul týraly búgin Qorshaǵan ortany qorǵaý mınıstrliginde alqa májilisinde vedomstvo basshysy Nurǵalı Áshimov málimdedi,
dep habarlaıdy QazAqparat.
Mınıstr Semeı polıgonyna jatatyn jerdi aýyl sharýashylǵyna berý jónindegi jumys aıaqtalýda jáne jaqyn arada halyq ıgiligine tapsyrylatyn bolady, dep otyr. «Qazirgi ýaqytta qorytyndy saraptama, qujat jumystary, óńir basshylarynyń kelisimi berilgen qujattar rásimdeý máselelerin aıaqtaý qaldy. Munda prıntsıpıaldy eshteńe joq, ádettegi tártipter jasalýda. Biz zańnamada kórsetilgen tártipterdi oryndaýdy aıaǵyna deıin jetkizbeı Prezıdent Jarlyǵyn daıyndaı almaımyz ǵoı», deıdi N. Áshimov.
«Semeı polıgonynyń paıdalanýǵa berilgeli jatqan jer aýmaǵy eldiń úsh oblysyna bólingen. Qorshaǵan ortany qorǵaý mınıstrligi bul aýmaqty tıimdi basqarý maqsatynda jerdi bir aımaqqa aýystyryp, onda jeke aýdan qurý jóninde usynys tastady», dep atap kórsetti ol.
Eske sala keteıik, Semeı polıgonyna qarasty jerdiń 80 paıyzyna jýyǵy aýyl sharýashylyǵyna jaramdy dep tabylyp, ony ekologııalyq qaýipi joǵary aýmaqtan shyǵarý, shekarany qaıta belgileý jumystary Qorshaǵan ortany qorǵaý mınıstrligi jáne birqatar vedomstvolardyń moıynyna júktelgen bolatyn.
