Semeı polıgonnyń lastanǵan alańdaryna halyq kedergisiz baryp júr – Energetıka mınıstrligi
Parlament Májilisinde Energetıka mınıstri «Semeı ıadrolyq qaýipsizdik aımaǵy týraly» jáne «Qazaqstan Respýblıkasynyń keıbir zańnamalyq aktilerine Semeı ıadrolyq qaýipsizdik aımaǵy máseleleri boıynsha ózgerister men tolyqtyrýlar engizý týraly» QR Zań jobalaryn usyndy. Qaralyp otyrǵan zań jobasy burynǵy Semeı polıgony jerlerin paıdalaný, onyń aýmaǵyn ońaltý, eldiń ǵylymı áleýetin damytý máselelerinde baqylaýdy kúsheıtýge baǵyttalǵan.
«Polıgondy jabýmen baılanysty birqatar problemalyq máseleler bar. Semeı polıgonynyń jerleri jergilikti atqarýshy organdardyń qaramaǵyndaǵy zapastaǵy jer bolyp sanalady, bul bógde adamdardyń is-áreketterin jáne osy aýmaqtarda bolyp jatqan oqıǵalardy qadaǵalaýdy qıyndatady. Odan bólek, polıgon jeri úsh oblystyń ákimshilik shekaralarynda ornalasqan, bul da burynǵy polıgon aýmaǵynyń qaýipsizdigin qamtamasyz etý máselelerin sheshýdi qıyndatady. Radıoaktıvti lastaný deńgeıine úzdiksiz monıtorıngtiń bolmaýy ol lastanýdyń eldimekenderge kóshýi boıynsha mańyzdy derekterdiń bolmaýyna ákep soǵady», - dedi Maǵzum Myrzaǵalıev Májilistegi dóńgelek ústel barysynda.
Mınıstrdiń aıtýynsha, halyq polıgonnyń lastanǵan alańdaryna kedergisiz kirip-shyǵyp júr, bul densaýlyqqa zııan keltirýi múmkin. 2008-2017 jyldary burynǵy polıgon aýmaǵynda 139 qystaq pen jazǵy úı anyqtalǵan, onyń 68-inde adamdar turady.
«Polıgonnyń normatıvten tys lastanǵan jerlerin qalpyna keltirý jumystary is júzinde júrgizilmeıdi. Polıgonnyń radıoekologııalyq jaı-kúıiniń aıqyn kórinisi men turaqty monıtorıngi joq, zalaldanǵan jáne taza jerlerdiń arasy bólinbegendikten, polıgon jerleriniń sharýashylyq aınalymǵa berilýin qıyndatady. Nátıjesinde polıgonnyń yqtımal jaramdy jerleriniń edáýir bóligi qazir bos jatyr», - dedi mınıstr.
Buǵan deıin M. Myrzaǵalıev Semeı ıadrolyq polıgonynda 13 jyl júrgizilgen zertteý aıaqtalǵanyn aıtqan edi. Búgingi tańda aýmaqtyń 100 paıyzy tekserilip, 2008-2021 jyldarǵa arnalǵan qorytyndy esep daıyndaldy.
