Semeı polıgonynan zardap shekkenderdiń biryńǵaı memlekettik reestri qurylýy múmkin
ASTANA. KAZINFORM – Senatta Semeı ıadrolyq synaq polıgonynyń jabylǵanyna 35 jyl tolýyna arnalǵan dóńgelek ústel ótti.
Parlament Senatynda Semeı ıadrolyq synaq polıgonynyń jabylǵanyna 35 jyl tolýyna arnalǵan dóńgelek ústel ótti. Іs-sharaǵa Senat depýtattary, memlekettik organdardyń, ǵylymı uıymdardyń, halyqaralyq uıymdardyń, qoǵamdyq birlestikterdiń ókilderi men sarapshylar qatysty.
Dóńgelek ústeldiń maqsaty — Semeı polıgonynyń zardaptaryn eńserý máselelerin talqylaý, áleýmettik qorǵaý tetikterin jetildirý, medıtsınalyq jáne ǵylymı zertteýlerdiń ózekti baǵyttaryn aıqyndaý, sondaı-aq halyqaralyq yntymaqtastyqty damytý boldy.
Іs-sharany ashqan Senat depýtaty Bıbigúl Jeksenbaı Semeı polıgonynyń jabylýy Qazaqstannyń ǵana emes, búkil adamzat tarıhyndaǵy mańyzdy oqıǵa ekenin atap ótti.
— Biz álemge Qazaqstannyń ıadrolyq qarýdan óz erkimen bas tartqanyn, Semeı polıgonynyń jabylǵanyn maqtanyshpen aıtyp kelemiz. Alaıda búgin biz taǵy bir mańyzdy suraqqa jaýap berýimiz kerek: osy synaqtardyń zardabyn tartqan azamattardyń máselesin tolyq sheshe aldyq pa? Tarıhı ádilettilik tek ótkendi eske alýmen emes, búgingi adamdardyń taǵdyryna naqty jaýapkershilikpen ólshenedi, — dedi senator.
Senatordyń aıtýynsha, búginde eń ózekti máselelerdiń biri — radıatsııalyq áserge ushyraǵan azamattardyń naqty sanyn anyqtaý jáne biryńǵaı memlekettik reestr qalyptastyrý.
— Biz halyqaralyq deńgeıde mıllıonnan astam adam zardap shekti dep aıtyp kelemiz. Biraq memleket naqty qansha adamnyń radıatsııalyq áserge ushyraǵanyn, olardyń qanshasy búgin ómir súrip jatqanyn, qanshasy qaıtys bolǵanyn, olardyń densaýlyq jaǵdaıy qandaı ekenin naqty bilýi tıis. Bul másele boljammen emes, dál derektermen sheshilýi kerek, — dedi Bıbigúl Jeksenbaı.
Dóńgelek ústel barysynda memlekettik organdardyń ókilderi áleýmettik qorǵaý, medıtsınalyq kómek kórsetý, radıatsııalyq monıtorıng júrgizý jáne Semeı ıadrolyq qaýipsizdik aımaǵy týraly zańnyń iske asyrylý barysy jóninde baıandama jasady.
Sondaı-aq qoǵamdyq uıymdar men sarapshylar qoldanystaǵy zańnamany jetildirý, áskerı qyzmetshilerdiń quqyqtyq mártebesin naqtylaý, medıtsınalyq skrınıng baǵdarlamalaryn keńeıtý jáne zardap shekken azamattardyń biryńǵaı memlekettik reestrin qurý jónindegi usynystaryn tanystyrdy.
Senator Bıbigúl Jeksenbaı óz sózinde máseleniń tek áleýmettik tólemdermen shektelmeýi kerektigin aıtty.
— Adamdarǵa tek járdemaqy nemese ótemaqy ǵana emes, ómir súrýge, eńbek etýge, balalaryn oqytýǵa jáne bolashaǵyn qurýǵa múmkindik berýimiz qajet. Sondyqtan Semeı óńirine qatysty saıasat ótemaqy tóleý saıasatynan damý saıasatyna kóshýi tıis, — dedi depýtat.
Qatysýshylar Konstıtýtsııalyq Sottyń Semeı polıgonyna qatysty qabyldaǵan quqyqtyq ustanymdarynyń mańyzyn atap ótip, ǵylymı zertteýlerdi jańartý jáne áleýmettik qorǵaý júıesin qazirgi jaǵdaıǵa beıimdeý qajettigin jetkizdi.
Syrtqy ister mınıstrliginiń ókilderi Qazaqstannyń ıadrolyq qarýsyzdaný salasyndaǵy halyqaralyq bastamalary, onyń ishinde ıadrolyq synaqtardan zardap shekken azamattarǵa kómek kórsetýge arnalǵan halyqaralyq trasttyq qor qurý jónindegi jumystar týraly aqparat berdi.
Dóńgelek ústel qorytyndysy boıynsha aıtylǵan usynystardy jınaqtap, múddeli memlekettik organdarǵa joldaý týraly sheshim qabyldandy.
— Semeı polıgonynyń zardaptaryn eńserý — tek ótkenniń máselesi emes. Bul — búgingi azamattardyń densaýlyǵy, áleýmettik ál-aýqaty jáne bolashaq urpaqtyń qaýipsizdigi úshin memleket pen qoǵamnyń ortaq jaýapkershiligi, — dep túıindedi Bıbigúl Jeksenbaı.
