Semeı, Pavlodar jáne Ekibastuzda esirtki saýdalaǵan qylmystyq top sottaldy
Semeı stantsııasyna jolaýshylar poıyzymen sıntetıkalyq esirtkiniń iri partııasyn ákelgen kýrer ustaldy.
Osydan soń Semeı kólik prokýratýrasynyń úılestirýimen polıtsııa qyzmetkerleri Semeı, Pavlodar jáne Ekibastuz qalalarynda psıhotroptyq zattardy asa iri mólsherde saýdalaýmen aınalysqan qylmystyq top múshelerin anyqtaý maqsatynda jedel is-sharalar júrgizdi.
«Nátıjesinde, ınternet-dúkenniń dırektory, klıenttermen baılanys ornatatyn operator jáne shaǵyn partııalardy jasyryp satyp júrgen adam ustaldy. Internet-dúkenniń barlyq qyzmeti Telegram áleýmettik jelisi arqyly júzege asyrylyp, qatysýshylardyń bir-biriniń shyn esimderin bilmeýi tergeý barysynda qıyndyq týǵyzdy», - deıdi Semeı kólik prokýrory Medet Nesipbek.
Onyń aıtýynsha, qylmystyq toptyń 120 mln teńgeden astam aqsha qarajatynyń aınalymy boldy.
Semeı qalasynda 29 jáne Pavlodar qalasynda 18 jasyryn esirtki saqtaý orny anyqtalǵan.
Tintý jumystary barysynda «qara naryqtaǵy» baǵasy 15 mln teńgeden asatyn psıhotroptyq zattardyń 2 myńnan astam birrettik dozasy tárkilendi.
«Alfa PVP» jáne «Marka» psıhotroptyq zattary adam jasýshalaryna lezde enip, bıologııalyq kedergilerdi aınalyp ótip, 2 dozadan keıin turaqty fızıkalyq jáne psıhıkalyq táýeldilikti týdyrady. Psıhotroptyq zattardy qoldanǵan kezde adamnyń oılaý qabileti tómendep, durys sheshim qabyldaı almaıdy», - deıdi M.Nesipbek.
Pavlodar oblysynyń qylmystyq ister jónindegi mamandandyrylǵan aýdanaralyq sotynyń úkimimen aıyptalýshylar 9 jyldan 18 jylǵa deıingi merzimge bas bostandyǵynan aıyryldy.
Olardan «Leksýs RX 300» jáne «Aýdı V5» markaly 2 avtokólik, qylmystyq jolmen tabylǵan aqsha tárkilendi. Sot úkimi zańdy kúshine endi.
