Semeı ormanyndaǵy órtti sóndirýge Qaraǵandy jáne Almaty oblysynan áskerıler tartyldy

SEMEI. QazAqparat - Tótenshe jaǵdaı mınıstri ıÝrıı Ilınniń ókimine sáıkes búgin tańǵy saǵat 4-te órt ornyna Qaraǵandy men Almaty oblystarynan 52859 jáne 28237 áskerı bólimderiniń qyzmetkerleri attandy, dep habarlaıdy QazAqparat.

Qazirgi ýaqytta Abaı oblysynda 3 ýchaskede: Podnebesnoe, Ýspenka aýyldarynda, Kashtak ormanshylyǵynda órtti sóndirý jumystary jalǵasyp jatyr.

Aerovızýaldy tekserý júrgizilý ústinde.

Sonymen qatar, órt ornyna arnaıy baılanys quraldarymen jaraqtandyrylǵan jyljymaly basqarý pýnkti qosymsha jiberildi.

Basqarý organy ol jerden tótenshe jaǵdaı aımaǵyndaǵy óz fýnktsııalaryn atqara beredi.

Eske sala keteıik, «Semeı ormany» rezervatynda 8 maýsym kúni órt shyqqan bolatyn.

«Órt naızaǵaıdyń 2 ret soǵýynan tutanǵan. Órtti tez arada aýyzdyqtaý múmkin bolmady, oǵan sebep - «Semeı ormany» rezervatynyń tehnıkasy bıik qum tóbeleri ornalasqan aımaqqa jete almady», - degen bolatyn Abaı oblysy ákiminiń orynbasary Dımıtrıı Garıkov.

Keıinirek Semeı ormanyndaǵy órtti sóndirýge jumyldyrylǵan 3 maman qaza tapty.

Memleket basshysy Qasym-Jomart Toqaev Tótenshe jaǵdaılar mınıstri ıÝrıı Ilınge Abaı oblysyndaǵy oqıǵa ornyna jedel baryp, órt sóndirý jumystaryn basqarý mindetin júktedi. Úkimetke jáne Abaı oblysynyń ákimdigine qaza tapqan orman sharýashylyǵy qyzmetkerleriniń otbasylaryna búkil kómekti kórsetýdi tapsyrdy.

Sondaı-aq Semeı qalasynda jergilikti aýqymda tabıǵı sıpattaǵy tótenshe jaǵdaı rejımi jarııalandy.

Abaı oblysyndaǵy órtke baılanysty jedel jeli ashyldy.

Memleket basshysy Qasym-Jomart Toqaevtyń 11-13 maýsym kúnderi Vetnamǵa josparlanǵan resmı sapary keıinge shegerildi.