Semeı ormanyndaǵy órtte qaza tapqan qyzmetkerlerge memorıaldyq taqta ornatyldy

SEMEI. QazAqparat – Búgin «Semeı ormany» rezervatynda qyzmettik boryshyn óteý kezinde qaza tapqan orman sharýashylyǵy qyzmetkerlerine arnalǵan memorıaldyq taqtanyń saltanatty ashylýy ótti. Bul týraly QazAqparat Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıtetine silteme jasap habarlaıdy.

Memorıaldyq taqtany ashý qurmetin orman sharýashylyǵynyń ardageri, Novaıa-Shýlba fılıaly Tsentralnoe ormanshylyqtyń sheberi Aleksandr Sergeevıch Reshetın qabyldady.

Orman órtimen kúresken batyrlardyń qurmetine mekeme ujymy men jaqyn týystary bastaryn ıip, bir mınýt únsizdik jarııalap, gúl shoqtaryn qoıdy.

«Alapat órtterden ormandy jáne adamdardy qorǵaýda qaza tapqan batyrlardyń erligi umytylmaýy úshin, ormandardy saqtaý men qorǵaýdaǵy aýyr da, qaýipti eńbekti keleshek urpaqtyń jadynda saqtaý úshin, erlik kórsetken áriptesterimizdiń esimderi jazylǵan memorıaldyq taqta ornattyq. Ómir – eń qymbat qazyna. Eshkim de, eshteńe de umytylmaıdy. Áriptesterimizdiń qazasy týraly jan túrshigerlik habardy bárimiz de tereń qaıǵymen eske alamyz. Olar bizdiń jadymyzda máńgi saqtalady», - dedi «Semeı ormany» memlekettik orman tabıǵı rezervaty» bas dırektorynyń m.a. Ásemgúl Nysambekova.