Semeı ormanyndaǵy órt kezinde eńbek qaýipsizdigi buzyldy ma – Eńbek mınıstrligi tekserý júrgizbek

ASTANA. QazAqparat - Eńbek jáne halyqty áleýmettik qorǵaý mınıstrliginiń ókilderi arnaıy Úkimettik komıssııa quramynda Abaı oblysyna ushyp ketti, dep habarlaıdy QazAqparat mınıstrliktiń baspasóz qyzmetine silteme jasap.

Memlekettik organnyń qyzmetkerleri «Semeı ormany» memlekettik orman tabıǵı rezervatynyń aýmaǵynda órtti sóndirý kezinde eńbek qaýipsizdigi jáne eńbekti qorǵaý talaptarynyń buzylýyna jol bergen adamdardy anyqtaý úshin tergeý júrgizedi. Sondaı-aq, vedomstvo ókilderi zardap shekkenderdiń otbasylaryna qajetti áleýmettik kómek kórsetý kólemin anyqtaıdy.

Abaı oblysyndaǵy «Semeı ormany» memlekettik orman tabıǵı rezervaty» RMM aýmaǵynda órt saldarynan bolǵan toptyq jazataıym oqıǵanyń sebepteri men mán-jaılaryn tergeý úshin QR Premer-Mınıstriniń birinshi orynbasary Roman Sklıardyń tóraǵalyǵymen arnaıy Úkimettik komıssııa quryldy.

Komıssııa quramyna tóraǵanyń orynbasary bolyp eńbek jáne halyqty áleýmettik qorǵaý vıtse-mınıstri Oljas Ordabaev, sondaı-aq Eńbek jáne halyqty áleýmettik qorǵaý komıtetiniń tóraǵasy – QR Bas memlekettik eńbek ınspektory Tólegen Ospanqulov, basqa da ortalyq memlekettik organdardyń, oblys ákimdiginiń, jumys berýshilerdiń jáne jumyskerler kásipodaǵynyń ókilderi engizildi.

Budan basqa, arnaıy komıssııa keltirilgen zalaldyń kólemin belgilep, zardap shekkender men qaza tapqandardyń otbasylaryna birinshi kezektegi kómek kórsetý jóninde sharalar qabyldaıtyn bolady.

Arnaıy Úkimettik komıssııa jumysty 10 jumys kúni ishinde aıaqtaıdy. Tergeý nátıjeleri týraly qosymsha habarlanatyn bolady.